Саҥа 2026 сыл үүнээри турдаҕына Саха сирин тыатын хаһаайыстыбатыгар дойдубут кииниттэн икки үөрүүлээх сонун кэллэ.
Бастакыта – “Саха сүөһүтэ” удьуор пуондатын хааһына тэрилтэтэ салгыы 5 сылга племенной үлэни ыытара бигэргэнэн, судаарыстыба племенной регистригэр официальнайдык киллэрилиннэ. РФ Тыатын хаһаайыстыбатын миниистирин солбуйааччы Р.В. Некрасов бу дьыл ахсынньы 23 күнүгэр племенной хаһаайыстыбалар көрүҥнэрин быһаарар туһунан бирикээскэ илии баттаата. Онно дойду араас эрэгийиэннэриттэн дьиэ кыылын-сүөлүн иитиигэ көрүҥнэрэ быһаарыллыбыт, чопчуламмыт 5 хаһаайыстыба киллэриллибит. “Саха сүөһүтэ” хааһына тэрилтэтэ Александр Артемьев салалтатынан алтыс сылын тахсыылаахтык үлэлиир. Ол туоһута – ааспыт үйэ ортотугар харса суох кыргыллыбыт саха сүөһүтэ эстэр туруктан таҕыста.
Иккиһэ – “Сахаагроплем” судаарыстыба бүддьүөтүн тэрилтэтин мөлүөкүлэ-удьуор экспертизатыгар уонна үүт хаачыстыбатын сэлиэксийэ өттүнэн хонтуруоллааһыҥҥа тургутар-чинчийэр лабораторията Арассыыйатааҕы аккредитация национальнай тиһигин аккредитациятын ааста. Билиҥҥи кытааппыт ирдэбилинэн маннык көҥүлэ суох буоллахха, племенной үлэ анаалыстара дьиҥэ суоҕунан ааҕыллаллар итиэннэ хаһаайыстыбалар племенной статустаналлара харгыстанар. Маны Саха сиригэр племенной үлэни сүрүннүүр тэрилтэ исписэлиистэрэ дьаныардаах, бэриниилээх үлэлэринэн ситистилэр.
Василий Никифоров
Хаартыска: “Сахаагроплем” тэрилтэ
Читайте нас в:
