Саха сиригэр күһүҥҥү үүнүү хомуурун үлэтэ түмүктэммитэ балачча кэм ааста эрээри, билиҥҥэ диэри сыыппараларга чуолкайдааһыннар киллэриллэ тураллар. Барыллааһын түмүк көрдөрүүлэринэн сирдэттэххэ, төһө даҕаны сааһа тымныытын, сайына сөрүүнүн иһин, сииктээх-силбиктээх буолан, орто үчүгэй үүнүүлээх сайын кэлэн ааста. Мантан аллара алтынньы 23 күнүнээҕи дааннайдары билиһиннэрэбит.
Туораахтаах култуура 12,1 тыһ. туонна хомуйуллара былааннаммыта. Отчуоттанар кэмҥэ 10 964 гектарга, ол эбэтэр ыһыы бүттүүн иэнин 98 бырыһыаныгар хомуур үлэтэ ыытылынна. Барыта 14 989 туонна туораахтаах култуура хомуйуллан, былааннаммыт көрдөрүү 123 бырыһыаныгар тэҥнэстэ итиэннэ ааспыт сыллааҕыттан 54 бырыһыанынан чорбойдо. Былырыыҥҥы хомуур түмүгэ 9 727 туонна этэ. Быйыл үүнүү онон лаппа үчүгэй: гектартан ортотунан 13,7-лии сэнтиниэр кэллэ.
Хортуоппуй бары киэптээх хаһаайыстыбаларга 74,8 тыһ. туонна хомуйуллара торумнаммыта. Бу кэмҥэ сыыппаралары чуолкайдыыллар. Хортуоппуй быйыл саас 6 373 гектарга олордуллубута, ол барыта хомуйуллан, 72 373 туонна буолбут, эбэтэр былааннаммыт таһым 96 бырыһыаныгар тэҥнэһэр. Хомуур түмүгэ былырыыҥҥы көрдөрүүттэн 1 бырыһыан кыра (ааспыт сылга статдааннайынан 72 720 туонна этэ). Гектартан ортотунан 113 сэнтиниэр “иккис килиэп” ылылынна.
Оҕуруот аһа 28,7 тыһ. туонна былааннаммыт буоллаҕына, бары киэптээх хаһаайыстыбалар бүрүөһүннээх уонна аһаҕас халлаан анныгар олордуллар оҕуруот аһын баалабайынан 29 628 туоннаны хомуйдулар. Ити иһиттэн тэпилииссэҕэ, парникка үүннэриллибитэ – 9 699 туонна. Инньэ гынан, былааннаммыт кээмэйтэн кыратык таһымнаата (103 бырыһыан) уонна былырыыҥҥы көрдөрүүттэн 14 бырыһыанынан ордук. Статдааннай туоһулуурунан, ааспыт сайын 25 903 туонна оҕуруот аһа хомуйуллубута. Быйылгы үүнүү гектартан ортотунан 149 сэнтиниэр буолла.
Василий Никифоров
Хаартыска: «Амма олоҕо» хаһыат
Читайте нас в:
