Өймөкөөн улууһа сүөһү-сылгы 2025 – 2026 сыллардааҕы кыстыгар 3 660 (кэлин уларытыллыбытынан, 3 200) туонна оту бэлэмниир былааннааҕыттан, кылгас сайын иһигэр ардах халааныттан иккитэ эмсэҕэлээн, 1 488 туоннатын, ол эбэтэр 42 эрэ бырыһыанын бэйэтин күүһүнэн булунар кыахтааҕын сабаҕалаабыта. Онон хотугу улуус тыатын хаһаайыстыбатыгар уустук быһыы-майгы бүрүүкээбитэ.
Тыа хаһаайыстыбатын уонна ас-үөл бэлиитикэтин миниистирэ Артем Александров балаҕан ыйын саҥатыгар улуус нэһилиэктэрин, хаһаайыстыбаларын кэрийэн, дьиҥ баар балаһыанньаны илэ көрө-билсэ сылдьар кэмигэр өймөкөөттөр тастан 1 164 туонна окко сайаапкалаан олороллоро. Ити кээмэйтэн, муҥ сатаатар, 600-чэ туонната сайыҥҥы уу суолун баттаһа тиксэрилиннэҕинэ эрэ улуус бааһынай уонна кэтэх хаһаайыстыбалара кыһыҥҥы суол туруор диэри салҕанан эрэр кыахтаахтарын этиммиттэрэ.
Министиэристибэ салалтата сүбэлэһэн баран, үөскээбит быһыыны-майгыны аахсан, Өймөкөөн улууһун ынах сүөһү, сылгы иитэр хаһаайыстыбаларыгар барыларыгар, кэтэх-кэпэрэтиип диэн араарбакка, көмө оҥорорго быһаарбыта. Миэстэтигэр тыа хаһаайыстыбатын исписэлиистэрэ нэһилиэктэр олохтоохторуттан окко сайаапка хомуйбуттарынан, тастан 1 201,9 туонна от тиэйиллиэхтээҕэ чуолкайдаммыта.
Министиэристибэ туһааннаах департамена отчуоттуурунан, тастан тиэйиллиэхтээх кээмэйтэн 1087,90 туонната, эбэтэр 90,52 бырыһыана сайыҥҥы уу суолун туһанан, массыыналарынан тиксэриллибит. Ол иһиттэн Өймөкөөҥҥө – 425,1 туонна (100%), Томторго – 359 туонна (81%), Төрүккэ – 77 туонна (100%), Үчүгэйгэ – 83 туонна (73,5%), Сордоҥнооххо – 119 туонна (100%), Уус Ньараҕа – 24,8 туонна (100%).
Оту, сүрүннээн, чугастыы илин эҥээрдээҕи улуустартан тиэйдилэр. Ол курдук, Мэҥэ Хаҥаластан 399,80 туонна (32 массыына), Уус Алдантан 537,3 туонна (43 массыына), Тааттаттан 64 туонна (5 массыына), Томпоттон 30 туонна (3 массыына). Ону таһынан Дьокуускай Хатаһыттан 24,8 уонна Нам улууһуттан 32 туонналыы оту тиэммит 2-лии массыынанан тиэртилэр.
Өймөкөөн суола-ииһэ суох учаастактарыгар кыһыҥҥы суол турдаҕына, хаалбыт кээмэйи, 114 туонна оту, Амма улууһуттан тиэйиэхтэрэ. Гарифуллин бааһынай хаһаайыстыбатыгар 30 уонна Томторго “Силис. Полюс холода” тыа хаһаайыстыбатын производственнай кэпэрэтиибигэр 84 туонна от тиийиэхтээх.
Хоту дойду хоһуун дьоно эрдэ сабаҕаламмыты куоһаран, 1 928 туонна оту бэйэлэрин сирдэриттэн-уоттарыттан ыланнар, былааннарын 60 бырыһыанын толордулар. Тэҥнэбилгэ суруйдахха, өймөкөөттөр былырыын баччаҕа 2 227 туонна оттоохторо (былаантан – 87 бырыһыан). Онон быйыл тастан тиэйиллибит уонна тиксэриллиэхтээх 1 200 туонна оту эптэххэ, былааннаммыт кээмэйтэн кыра итэҕэстээх эрэ букатын быр-бааччы кыстыыр кыахтаннылар.
Василий НИКИФОРОВ
Хаартыска: Александр Оконешников телеграм-ханаалыттан
Читайте нас в:
