Матрена Михайловна Тимофеева (1882-1961 сс.) — Үөһээ Бүлүү оройуонун Ороһу нэһилиэгин олохтооҕо.
1937 сыллаахха Былатыан Ойуунускай норуот өстөөҕө аатыран хаайыллыбытын кэннэ кини суруйбут “Туналҕаннаах ньуурдаах Туйаарыма Куо” олоҥхотун Матрена Михайловна төрөппүт уолаттара Ньукулай, Баһылай кистээбиттэр. Аҕа дойду Улуу сэриитигэр баралларыгар ийэлэригэр уурдараллар.
Уола Ньукулай Аҕа дойду сэриитигэр сураҕа суох сүтэр. Баһылай диэн уола сэрииттэн 1950 сыллаахха этэҥҥэ эргиллэн кэлэн баран, биир сылынан сөмөлүөт саахалыгар өлөр.
Саха эмээхсинэ уолаттарын кэриэстээн, Былатыан Ойуунускай олоҥхотун хоппоҕо уган кистээн сытыарар. Бу Матрена Михайловна сүрэҕэр сөҥүөрдэн, кичэмник уурбут кылаатын өлбүтүн кэннэ чугас дьоно хоппону күлүүһүнэн аһан булаллар. Бу туһунан 1970-с сыллар ортолоругар Ороһуга командировкаҕа кэлэ сылдьан Михаил Спиридонович Иванов-Багдарыын Сүлбэ олохтоохтортон истэн хаһыакка бэчээттэппитэ. Сиэннэрэ эбэлэрин кэриэстээн “Мотуруоһа кылаата” диэн кинигэ таһаарбыттара.
Светлана Халгаева
Читайте нас в:
