Дьокуускайга бу дьыл муус устар 12-13 күннэригэр “Сулус” ытыыга үөрэтэр киин полигонугар өрөспүүбүлүкэ таһымнаах күрэхтэһии иккис түһүмэҕэ ыытылынна. Булчут күнүнээҕи тэрээһиҥҥэ киирсэр буолан, “булт снайпина” дэнэр. Улуу Кыайыы 80 сылыгар уонна Арассыыйаҕа Аҕа дойдуну, Саха сиригэр Ийэ дойдуну көмүскээччилэр сылларыгар анаммыт күрэхтэһиигэ өрөспүүбүлүкэ улуустарыттан, куораттарыттан кэлбит 120-чэ булчут буулдьа саанан ырааҕы ытыыга ким бэргэнин быһаарыста.

СӨ бырабыыталыстыбатын бэрэссэдээтэлин солбуйааччы Сергей Местников күрэхтэһиини арыйар үөрүүлээх түгэҥҥэ: “Дойду үрдүнэн маннык оҥоһуулаах иккис полигон суох. Биһиги турнирбытыгар бүгүн элбэх булчут күрэхтэһэ кэлбитэ успуорт бу көрүҥүн дьон кэрэхсиирин туоһулуур. Ытыы – Саха сирин баай устуоруйатын арахсыспат сорҕото, киэн туттуута. Өбүгэлэрбит былыр-былыргыттан тииҥи харахха түһэрэр кыраҕы харахтаах ытааччыларынан биллэллэрэ. Аҕа дойду Улуу сэриитигэр биһиги снайпердарбыт ону бигэргэппиттэрэ. Маннык күрэхтэһиилэр чөл олоҕу тэнитэргэ эрэ буолбакка, төрөөбүт дойдуларыгар бэриниилээх, түмсүүлээх, күүстээх санаалаах ыччаты иитэн таһаарыыга сүҥкэн оруоллаахтар уонна  элбэх кыттааччыттан ытыыга дьоҕурдаах эдэр дьону булан-талан өйүүргэ көмөлөөхтөр. Кинилэртэн инникитин ырааҕы ытыыга идэтийбит, Саха сирин чулуу булчуттарын уонна Аҕа дойдуну көмүскээччилэрин үтүө үгэстэрин салҕааччылар иитиллэн, чочуллан тахсыахтарыгар бүк эрэнэбин”, – диэтэ.

Өрөспүүбүлүкэтээҕи күрэхтэһии бастакы түһүмэҕэ олунньу 22 күнүгэр ыытыллыбыта. Быһаарыылаах түмүктүүр үһүс түһүмэх балаҕан ыйыгар буолуоҕа. Балар түмүктэринэн Сэбиэскэй Сойуус Дьоруойа, саха аатырбыт снайпера Федор Матвеевич Охлопков кэриэһигэр ыытыллар Бүтүн Арассыыйатааҕы күрэхтэһиигэ кыттааччылар сүүмэрдэниэхтэрэ.

Санаттахха, Бүтүн Арассыыйатааҕы иккис турнир былырыын “Сулус” полигоҥҥа алтынньы 12-13 күннэригэр буолбутугар дойду эрэгийиэннэриттэн 140 чулуу ытааччы, ол иһигэр анал байыаннай дьайыыга быһаччы кытта сылдьар снайпердар, күөн көрсүбүттэрэ.

Булчут күнүгэр анаммыт күрэхтэһиигэ ытыы көрүҥнэринэн кимнээх бастаатылар уонна бириистээх миэстэлэргэ тигистилэр? Туртаһы аһаҕас сыалынан ытыыга Василий Готовцев кыайыылааҕынан таҕыста. Иккис үктэлгэ Ариан Аммосов, үһүскэ Петр Давыдов турдулар. Туртаһы оптикалаах харабыынынан ытыыга Федор Борисов, Геннадий Семенов, Николай Семенов күннээтилэр. Тайаҕы аһаҕас сыалынан ытыыга Борис Мухоплев, Степан Попов, Серафим Луковцев, оптикалаах ытыыга Александр Копытков, Ариан Аммосов, Михаил Ефимов үс миэстэ иһигэр киирдилэр. “Чубукуга” Иван Христофоров, Геннадий Семенов, Александр Данилов табыллан ыттылар.

“Хотугу снайпер” көрүҥҥэ Семен Яковлев бастаата. Дыгын Попов иккис, Александр Дубонос үһүс бириистээх миэстэлэри ыллылар. Оттон хамаанданан түмүгү таһаарыыга Уус Алдан улууһун хамаандата (Василий Бурнашев, Ариан Аммосов, Василий Местников, Михаил Ефимов, Кирилл Местников) кыайыылааҕынан ааттанна. Иккис миэстэлээх – Куорунай улууһун хамаандата (Владимир Григорьев, Роман Фахурдинов, Николай Семенов, Геннадий Семенов, Александр Копытков). Үһүс миэстэлээх – “Сэлии булчуттара” хамаанда (Спиридон Чочанов, Павел Михайлов, Евгений Дьячковскай, Владимир Дьячковскай, Александр Данилов). Бэтэрээн ытааччыларга Александр Данилов бастакы (Саха сиринээҕи   снайпинг федерациятын бэрэссэдээтэлэ Александр Джурович бэйэтинэн холобур буолара кэрэхсэбиллээх), Дмитрий Васильев үһүс, Спиридон Старостин үһүс миэстэлэри үллэһиннилэр.

Василий НИКИФОРОВ