Булчут күнүгэр Мэҥэ Хаҥаласка «Кыымаан» питомникка Улуу Кыайыы 80 сылыгар уонна Николай Тастыгин сырдык кэриэһигэр анаммыт саха булчут боруодалаах ыттарын талыыга бастакы өрөспүүбүлүкэтээҕи быыстапка ыытылынна диэн суруйар «Эркээйи» хаһыат.

Икки күн устата ыытыллар тэрээһиҥҥэ кэлбит Саха сирин байанайдаах булчуттарыгар, ыты сэҥээрээччилэргэ, ыалдьыттарга алгыс сиэрин-туомун түсчүт Зиновий Игнатьев оҥордо.

Быыстапканы арыйыыга СӨ Ил Түмэн Судаарыстыбаннай Мунньаҕын Сир сыһыаннаһыыларыгар, айылҕа ресурсаларыгар уонна экологияҕа кэмитиэтин бэрэссэдээтэлэ Андрей Находкин, улуус баһылыгын бастакы солбуйааччы Василий Михайлов, Москва куораттан кинолог, Булчуттар уонна балыксыттар Арассыыйатааҕы сойуустарыттан лайка боруодатын уонна бэрэбиэркэтин эксперэ Константин Гололобов, Тыа хаһаайыстыбатын билимин доктора, быыстапка кылаабынай судьуйата Реворий Иванов, «Саха ыта» көҕүлүүр бөлөх салайааччыта Валерий Никифоров уонна Николай Тастыгин дьиэ кэргэнэ, бииргэ төрөөбүттэрэ эҕэрдэ тылларын эттилэр.

Андрей Находкин, СӨ Ил Түмэн Судаарыстыбаннай Мунньаҕын Сир сыһыаннаһыыларыгар, айылҕа ресурсаларыгар уонна экологияҕа кэмитиэтин бэрэссэдээтэлэ:

– Бүгүҥҥү түһүлгэ уратылаах. Өрөспүүбүлүкэҕэ саха ытын талыыга, көрүүгэ бастакы тэрээһин буолар. Саха сирин араас муннуктарытан саха булчут ытын иитэр дьоммут-сэргэбит ыттарын манна аҕалан экспердэргэ көрдөрөллөр.

Түһүлгэҕэ анал регламены, мээрэйи ааһан, бастыҥ 30 «саха ыта» боруодалаах ыттар талылллыахтара. Улахан дөкүмүөн хомуллан, мантан сайын Москваҕа Арассыыйатааҕы кинологтар федерацияларыгар тиийиэҕэ.

Балтараа сыл устата туһааннаах үлэни ыыппыппыт түмүгэр «Саха ыта» диэн ааттаах ураты боруоданы таһааран, патент ылыахтаахпыт.

Саха норуотугар «саха ынаҕа», «саха ата» баалларын курдук, булчут дьоммутугар «саха ыта» баар диэн дакаастыахтаахпыт, – диэн иһитиннэрдэ.

Иван Лукин