Дьокуускай куоракка сыыппара трансформациятыгар икки күннээх стратегическай сессия буола турар. Улахан тэрээһиҥҥэ «Сбербанк» тэрилтэтиттэн сүүрбэччэ киһилээх дэлэгээссийэ, итиэннэ Бырабыыталыстыба бэрэстэбиитэллэрэ, биллэр-көстөр эспиэрдэр, кыттааччылар олох араас хайысхаларыгар сыыппара технологияларын киллэрии, инники кэскилин, ситиһиилэрин, итиэннэ кыаҕын тула кэпсэттилэр.

Күн бүгүн искусственнай интеллект лабораториятын иһинэн 5 бырайыагы көрөллөр, бу мантан кыччаабыта үс бырайыага сотору кэминэн олоххо киириэҕэ диэн “Сбербанк” Байкаллааҕы бэрэссэдээтэлэ Рушан Сахбиев статегическэй сессия үөрүүлээх аһыллыытыгар тоһоҕолоон эттэ.

Саха Өрөспүүбүлүкэтин Экологияҕа, айылҕаны туһаныыга уонна ойуур хаһаайыстыбатыгар миниистири бастакы солбуйааччы Джулустан Хон:

— Хас сыл ахсын уу халаана кэлэн, кэккэ ыарахаттары, улахан суумалаах хоромньуну аҕалар. Бу маны барытын эрдэттэн көрөр-билэр, ыарахаттары туоратар, чэпчэтэр туһуттан, искусственнай интеллект нөҥүө халаан уута хайдах сайдарын, хамныырын аҕыйах күн инниттэн көрөр-билэр кыахтаахпыт. Ойуур баһаарын чааһыгар тохтоон ааһар буоллахха, баһаар турбут сирин спутник нөҥүө көрөбүт, онтон бу аныгы үйэ кыаҕын киллэрдэхпитинэ – тыал хайысхатыттан саҕалаан, баһаарга үлэлиир дьон ахсааныгар тиийэ, онтон да атын кэккэ боппуруостарга эрдэттэн хоруй ылан, үлэбитигэр туһаныахпытын сөп. Биһиги искусственнай интеллект кыаҕын үлэбит хайысхатыгар киллэрдэхпитинэ, улахан көмөнү аҕалыахтаах.

Искусственнай интеллект көмөтүнэн мас үрдүгүн, туругун уонна да атын дааннайдары толору билиэххэ сөп. Бу  кутталы эрдэттэн билэн туоратарга, тыаны харыстыырга кыах биэриэҕэ. Ону таһынан, спутниковай ойуулары ырытан, мас-от уонна уу ресурстарын туруктарын кэтээн көрүөххэ сөп.

Бэлиэтээн эттэххэ, Саха Өрөспүүбүлүкэтэ цифровой саҥа сүүрээннэри киллэриигэ инники күөҥҥэ турарынан биллэр.

Ааптар хаартыскаҕа түһэриитэ

---

Өссө ааҕыҥ:

Будущее уже здесь: как Якутия использует ИИ для развития региона