Бүгүн Сунтаар улууһугар Сунтарскай переулок, 1А аадырыска элбэх кыбартыыралаах таас дьиэ иккис уочаратын, итиэннэ оҕо оонньуур былаһааккатын үөрүүлээх быһыыга-майгыга арыйдылар. Бу үлэ дойду бэрэсидьиэнэ Владимир Путин көҕүлээбит «Олорор дьиэ уонна куорат эйгэтэ» национальнай барыл иитинэн «Хаарбах дьиэттэн дьону көһөрүү» өрөспүүбүлүкэтээҕи анал бырагырааманан уонна тиэргэннэри тупсаҕай оҥорууга туһуламмыт «Уһук Илиҥҥэ 1000 тиэргэн» барылынан ыытылынна, диэн «Сунтаар сонуннара» суруйар.

Бу дьиэ бастакы, иккис подъеһыгар барыта 48 саҥа кыбартыыра күлүүһүн хаһаайыттарга туттардылар. Таас дьиэ тутуутун Владимир Яковлев салайааччылаах «Дабанстрой» ХЭТ тутан үлэҕэ киллэрдэ. «Дабанстрой» тэрилтэ Сунтаар улууһугар олус элбэх тутууну, ол иһигэр социальнай эбийиэги ылсан таһаарыылаахтык үлэлиир.
Дьиэ хаһаайыттара бары ирдэбилгэ эппиэттиир, толору хааччыллыылаах дьиэҕэ киирэллэриттэн олус үөрэллэр.

Бэлиэ түгэҥҥэ СӨ Бырабыыталыстыбатын бэрэссэдээтэлин солбуйааччы Георгий Степанов, СӨ үп миниистирин эбээһинэһин толорооччу Иван Алексеев, улуус баһылыга Анатолий Григорьев, Сунтаар нэһилиэгин баһылыгын солбуйааччы Семен Николаев уонна ыраахтан-чугастан ыҥырыылаах ыалдьыттар кыттыыны ыллылар, эҕэрдэ тыл маанытын эттилэр.

Елизавета ТИТОВА