Бүгүн, төрөөбүт төрүт тыл уонна сурук-бичик күнүн көрсө, Былатыан Ойуунускай аатынан Саха тыйаатырыгар Владимир Николаев аатынан Сунтаардааҕы норуот тыйаатыра Анемподист Иванович Софронов-Алампа суруйбут «Олох дьэбэрэтэ» драматын туруорда.

Режиссер Динислам Тууйас уонна артыыстар бэйэлэрин талааннарын уонна уус-уран көрүүлэрин испэктээкилгэ киллэрэн, көрөөччүлэргэ ураты киэһэни бэлэхтээтилэр.

Оруолларга артыыстар олус итэҕэтиилээхтик оонньоотулар. Ол курдук: Баһылайы — Ефрем Афанасьев, Алааппыйаны — Туяра Алексеева, Уйбааны — Семен Васильев, Маайаны — Сардана Контогорова, Даайыһы- Ньургуйаана Харчасова, Отчут уолу — Герман Иванов турукка киирэн, илэ ынараа кэмҥэ көрөөччүлэри илтилэр. Кинилэр оонньуулара уонна талааннара испэктээкилгэ ураты сырдатыыны, иэйиини уонна дириҥ суолталаах өйдөбүлү биэрэн, Сунтаар талааннаах артыыстара көрөөччүлэр биһирэбиллэрин, хайҕабылларын ыллылар.

Испэктээкил ис хоһооно Александр Островскай «Гроза» пьесатыгар майгынныыр. Эдэр дьахталлар Маайа уонна Даайыс олох баттабылыгар сөпсөспөккө, туох баар бүтэһик күүстэринэн, тиһэх тыыннарын утары бараллар. Кинилэр тапталлаах буолуохтарын баҕараллар уонна тапталы көрдүүллэр, ол эрээри төрөппүттэрэ бэйэлэрин өйдөбүллэринэн кинилэргэ үчүгэйи уонна куһаҕаны, үрүҥү уонна хараны, тапталы уонна өһүөнү, төрүүнү уонна өлүүнү баҕараллар.

Валентина Догоюсова, ааптар хаартыскаҕа түһэриитэ