Бэрдьигэстээх сэлиэнньэтин «Кэнчээри» уһуйаана доруобуйаны харыстыыр эйгэни тэрийиигэ дьаныһан туран үлэлиир. Иитээччилэр оҕолору уонна төрөппүттэри кытта араас хайысханы талаллар. Холобур, сахалыы төрүт ас — чэгиэн буолуу төрдө.
Оҕо төрүт аһынан аһыыра дьиэ кэргэнтэн быһаччы саҕаланыахтаах. Ол иһин төрөппүттэр төрүт ас туһатын эмиэ өйдүөхтээхтэр уонна ону өйүөхтээхтэр диэн санаалаах «Алаас оҕолоро» кыра бөлөх төрөппүтэ Анастасия Заровняева.
— Кыыһым Сардаана эбээтэ оҥорбут барыанньалаах тоҥ күөрчэҕин сөбүлүүр аҕай. Оттон тоҥ отону, сугуну суоратыгар куттан күн аайы сиир.
Чохоону, тоҥ күөрчэҕи бары да сөбүлүүбүт. Мас көтөрүн, кус миинин биир эмитэ өрөбүлгэ түбэһиннэрэн буһарынабыт, — диэн кэпсиир Анастасия Михайловна уонна аҕыйах сахалыы рецебынан ааҕааччыларбытын кытта үллэстэр.
Баахыла
Үүт — 300 мл, уу — 100 мл, сымыыт — 1 уст., ууллубут арыы, туус — ч. нь. төбөтүнэн, саахар — 2 ост. нь.
Таҥсык
Эриллибит убаһа этин уонна сыатын туустаан-тумалаан баран буккуйабыт уонна халбаһыы курдук формалаан тоҥоро уурабыт.
Күөрчэх
Тоҥ күөрчэх оҥорорго биһиэхэ наада чөчөгөй уонна сир аһыттан барыанньа.
Маҥнай чөчөгөйү ытыйабыт, барыанньаны эбэбит уонна өссө ытыйан баран илиискэ тарҕата кутан, тоҥоро таһаарабыт.
Чохоон
1,5 кг чохооҥҥо наада 0,5 кг ынах арыыта, 1 л үүт, бэйэ сөбүлүүрүнэн саахар эбэтэр барыанньа.
Дьиэҕэ турбут сымнаҕас арыыга кыратык сылаас үүт кутабыт уонна эрчимнээхтик ытыйабыт. Сыыйа уочаратынан тымныы, сылаас үүтү кутан биэрэ-биэрэ ытыйабыт. Онтон саахары эбэтэр барыанньаны кутабыт. Уонна араастаан формалаан баран тоҥоро уурабыт
Минньигэстик аһааҥ!
Читайте нас в:
