Кэлиҥҥи дааннайынан, өрөспүүбүлүкэ үрдүнэн 58 538,43 туонна үүт соҕотуопкаланан, былааннаммыт 54 924,78 туоннаны 6,5 бырыһыанынан аһара барда. Оттон ый бүтэн, сыллааҕы түмүк таһаарыллыа өссө даҕаны сүүрбэччэ хонук баар. Оччоҕуна үүт тутан астыыр сыахтар үүнэр сылга диэри үлэлэрин тохтоттулар дуо?
Тыа хаһаайыстыбатын уонна ас-үөл бэлиитикэтин министиэристибэтин астыыр-үөллүүр салаатын салайааччыта Егор Чичигинаров иһитиннэрэринэн, Дьокуускай куорат, Нам уонна Сунтаар улуустара үүт туталларын тохтоппуттар. Дьокуускай 3 242,59 туонна үүтү тутан, былаанын 123,45 бырыһыан толорбут, 696,9 туонна үүт аһара тутуллубут. Нам улууһа 122,11 бырыһыаннаах, 2 674,27 туонна үүттээх, 510 туоннаны аһара туппут. Сунтаар 119 бырыһыаннаах, 6 832,35 туонна үүтү соҕотуопкалаабыт, аһара соҕотуопкаламмыта – 1 050 туонна үүт.
Ити курдук Мэҥэ Хаҥалас улууһа 1 004,41, Хаҥалас 644,48, Ньурба 531,47, Амма 500, Ленскэй 246,9, Чурапчы 200, Кэбээйи 167,128, Бүлүү 120, Өлүөхүмэ 110,36 туонналыы үүтү аһара туталлара күүтүллэр. Ол эбэтэр барыларын холбоон, былааннаммыт кээмэй 5 781,65 туоннанан таһымныахтаах. Быйыл 54,9 тыһ. туонна үүт соҕотуопкаланарыгар 3 млрд 570 мөл. солкуобай кээмэйдээх субвенция көрүллэн, 20 улууска уонна Дьокуускай куоракка 3 млрд 526 мөлүйүөнэ (99,1 бырыһыана) тиксэриллэн турар.
Егор Владимирович аһара тутуллубут үүт иһин төлөһүүгэ 367,117 мөл. солкуобай өрөспүүбүлүкэ бүддьүөтүттэн эбии көрүллүөхтээҕин этэр. Билиҥҥитэ уураах бырайыага бырабыыталыстыба бэрэссэдээтэлигэр киирэн сытар, илии баттаныахтааҕын күүтэллэр эбит. Субвенция эбии көрүлүннэҕинэ, 2024 сылга 60 706,43 туонна үүт соҕотуопкаланан, былаан 110,53 бырыһыан туолуоҕа. Урукку сылларга былаан сиирэ-халты туоллаҕына махтал курдук буолааччы.
“Маннык быһыы-майгы улуустар үүт тутар кээмэйдэрин, сыл түмүгүнэн былааннарын толорботохторуна субвенция үбүн төннөрөллөрүттэн саллан, тарда соҕус былааннаабыттарыттан таҕыста”, – диэн быһаарда салаа салайааччыта.
Быйыл барыларыттан намыһах көрдөрүүлээх Үөһээ Бүлүү улууһа өрөспүүбүлүкэ бүддьүөтүгэр 72 мөл. солкуобайы төннөрүөҕэ. Улууска соҕотох соҕотуопсук “Үөһээ Бүлүү” ХЭУо 2,5 тыһ. туонна үүтү соҕотуопкалыыр былааны ылыммытыттан сыл түмүгүнэн 80 бырыһыанын толорор, ол эбэтэр 1,5 тыһыынчатын тутар туруктааҕын туһунан быйыл саас муус устартан салайааччынан анаммыт Николай Алексеев иһитиннэрдэ. Николай Иванович улуус астыыр-үөллүүр тэрилтэтин урут уһуннук салайан, атаҕар туруорбут киһи хараҕынан көрөн:
“Букатын атын тэрилтэҕэ кэлбитим. Ыал үксэ “төбө харчытын” ылар буолан, соҕотуопкаланар кээмэй лаппа кыччаабыт. Сургуулук курдук кэпэрээссийэлэспит эрэ нэһилиэктэр арыый көбүччү туттараллар. “Үөһээ Бүлүү” ХЭУо инники сылларга фактическайынан тыһыынча иһинэн соҕотуопкалыы олорбут буоллаҕына, 1,5 тыһ. туонна үүккэ тириэртэхпитинэ, хамсааһыны таһаарбыкка тэҥнээх буолуоҕа. Эһиилгиттэн мэхэньииһим уларыйан, субсидия тыырыллыытын улуус бэйэтэ быһаарар буоллаҕына, үүт туттарыан баҕалаах элбиэҕэр эрэллээхпин”, – диэтэ.
Василий Никифоров
Өссө ааҕыҥ
Тыа хаһаайыстыбатын үлэтин өйүүр мэхэньиисими уларытыы түмүгэр улуустар көмө үбү бэйэлэрэ олохтуур, үллэрэр кыахтаннылар
Читайте нас в:
