Үөрэх, билии аартыга арылынна
Көмүс кыымы ыһа тур
Көлүөнэттэн көлүөнэҕэ,
Киһи-аймах киэн туттар
Ыччаттарын иитэ тур.

Н. Ф. Егоров

Балаҕан ыйын 2 күнүгэр Кэбээйи улууһун Мукучу нэһилиэгэр саҥа тутуллубут икки этээстээх таас оскуола аанын тэлэччи аһар кэрэ бэлиэ түгэнэ үүнүөҕэ. Үөрэх кыһатын дьиэтэ “Үөрэҕирии” национальнай бырайыак чэрчитинэн, дойдубут президенэ Владимир Путин, Ил Дархан Айсен Николаев, ону сэргэ Саха Өрөспүүбүлүкэтин Бырабыыталыстыбатын өйөбүллэринэн тутулунна.

Биллэрин курдук, Танара орто оскуолата баай, дириҥ историялаах, көлүөнэ ыччаты иитиигэ-үөрэтиигэ тус кылаатын киллэрсэн айымньылаахтык, таһаарыылаахтык үлэлиир-хамсыыр өрөспүүбүлүкэ биир кырдьаҕас оскуолата. Үөрэх кыһатыгар Новиковтар уонна Спиридоновтар учуутал династиялара үтүө үгэһи салҕаан оҕону иитэр-такайар үлэ үөһүгэр сылдьалларын бэлиэтиир тоҕоостоох. Кэнчээри ыччат киэҥ билиилээх, эт-хаан өттүнэн сайдыылаах, олоххо бэлэмнээх киһи буолан, үүнүү-сайдыы аартыгар үктэнэригэр оскуола кэлэктиибэ кыһамньытын уурар. Ол курдук, 2023-2024 үөрэх сылыгар тус предметтэри дириҥэтэн үөрэтэр хайысхалаах И.Е. Левин аатынан Танара орто оскуолатын (директор Эверстов Е.П.) 4 оҕо туйгун сыананан түмүктээннэр, биир кыһыл көмүс, үс үрүҥ көмүс мэтээли ыллылар. Быйыл сайын “Азия оҕолоро” 8-c Норуоттар икки ардыларынааҕы спортивнай оонньууларга успуорт оскуола иитиллээччилэрэ Марк Антонов уонна Олег Кононов хапсаҕайга (тренер Иванов М. В.) чаҕылхай ситиһиилэнэн төрөөбүт дойдуларын, бүтүн Саха сирин чиэһин көмүскээтилэр. Үөрэнээччилэр үрдүктэн үрдүк чыпчаалга дабайан, суоллара арыллан иһэриттэн нэһилиэк дьоно-сэргэтэ, үөрэппит учууталлара үөрэллэр, киэн тутталлар.

Мукучу нэһилиэгин дьоно-сэргэтэ, оҕо аймах уһун сылларга кэтэспит ыра санаалара туолан, икки этээстээх таас оскуола арыллар үөрүүлээх күнэ тосхойбутунан ис сүрэхтэн долгуйаллар, бар дьоҥҥо махтаналлар. Саҥа оскуола билиҥҥи кэм ирдэбилигэр эппиэттиир үөрэнэр кабинеттардаах, лабораториялардаах, мастарыскыайдаах, компьютерга дьарыктанар кылаастардаах, киэҥ-куоҥ, сырдык актовай, спортивнай саалалардаах, оҕо доруобуйатын көрөр-истэр медкабинеттаах, библиотекалаах, парниктаах о.д.а. тыа сирин усулуобуйатыгар сөп түбэһэр толору хааччыллыылаах.

Сайдыылаах үйэ тэтиминэн саҥа оскуола тутуллан, алгыстаах ыллыгынан, алтан чуораан тыаһынан ыраахтан-чугастан ыччаты ыҥыртаата. Үөрэх, билии аартыга үрдүккэ, сырдыкка угуйар ураты эйгэтэ арылынна! Бүтүн көлүөнэни иитэн-такайан таһаарбыт оскуолабыт барахсан үтүө үгэһэ салҕанан үйэлэргэ аата-суола ааттана, үүнэ-сайда туруохтун!

Светлана Самсонова, Мукучу

Кычкина А. Д. хаартыскаҕа түһэриилэрэ

Также по теме:

В День знаний откроют новую школу в Кобяйском районе Якутии