Саха сирин ходуһаларыгар от үлэтэ үмүрүйүө ыраах. Саҥа нэдиэлэ саҕаланыытыгар хомуйуллан чуолкайдаммытынан, 281 774 гектар иэннээх сир охсулунна, 298 414 туонна от кэбиһилиннэ. Өрөспүүбүлүкэ 28 улууһугар уонна 2 куораттааҕы уокуругар 21 079 киһи оттуу сылдьар, 9 710 тыраахтар күүһэ туһаныллар. Барыта 8 286 звено баарыттан мэхэньисээссийэлээҕэ – 2 774, мэхэньисээссийэ аҥаардааҕа – 3 367, ат көлөлөөҕө – 74, илиинэн оттооччута – 1 975.

Отчуоттанар кэмҥэ бүттүүн былааннаммыт кээмэйтэн 68 бырыһыана кэбиһилиннэ. Бу сырыыга Уус Алдан отчуттара бытаардылар (чуолкайа, саҥа көрдөрүүлэрин биэрбэккэлэр, былааны толоруу ааспыт чэппиэрдээҕи 79 бырыһыанынан турар). Инньэ гынан Нам 87, Ньурба 86, Хаҥалас 84 уонна хотулартан Эдьигээн 84, Орто Халыма 80 бырыһыаннаах инники күөҥҥэ иһэллэр.

Илин эҥээрдээҕи улуустарга бу күҥҥэ саамай мөлтөхтөрө Таатта улууһа былаанын 40 бырыһыанын толордо. Аммалар 55, чурапчылар 56, мэҥэ хаҥаластар 73 бырыһыаннаахтар. Бүлүү сүнньүгэр Ньурбаны таһынан Сунтаар уонна Бүлүү 75 бырыһыаҥҥа тиэртилэр. Ус сайыны быһа уоттуун охсуһа-охсуһа оттуур үөһээ бүлүүлэр 72 бырыһыаҥҥа тиэртилэр.

Аны ааспыт өҥ сайыны кытта тэҥнээтэххэ, бүттүүн тэтим 14 бырыһыанынан хаалан иһэр. Ол гынан баран, былырыыҥҥы тэтимнэрин ситиһиннэрбиттэр эбэтэр куоһарбыттар элбээн эрэллэрэ үөрдэр: Өлүөхүмэ уонна Кэбээйи 109-туу, Ньурба 102, Ленскэй 101, Хаҥалас 100 бырыһыаннаахтар.

Бу кэмҥэ 120 мобильнай биригээдэ отчуттара 8 912 туонна оту туруордулар. Амма хаһаайыстыбаларыттан 35 биригээдэ 3 206 туонна кэбиһиилэннэ. Мэҥэ Хаҥаластан 18 биригээдэ 1 384 туонна оттонно. Чурапчы 15 мобильнайа 1 603 туонналаах.

Оту таһынан сүөһү сүмэһиннээх аһылыгар 2 905 туонна сиилэс (былаантан 10 бырыһыана, былырыын баччаҕа 3 110 туонна баара) угулунна, 884 туонна сенаж (былаантан 6 бырыһыана, былырыын баччаҕа 696 туонна баара) сууланна.

Василий Никифоров