Атырдьах ыйын бүтэһигэр Ньурба улууhун баһылыга Иннокентьев Алексей Михайлович биир дойдулаахтарбытын көрсө, дойду сонунун кэпсии, дойдуларыттан дьонноро анаан ыыппыт посылкаларын, тэрилтэлэр оҥорбут сиэккэлэрин, таҥастары, сахалыы астарын илдьэ барыахтаах, биллэрэр «Ньурба уоттара» хаhыат.
Ньурба оройуонун Октябрьскай нэһилиэгиттэн анал байыаннай эпэрээссийэҕэ 56 эдэр ыччаппыт, ыал аҕалара Ийэ дойдуларын көмүскүү, биһиги эйэлээх олоххо олорорбут туһугар сэриилэһэ сылдьаллар.
Биһиги нэһилиэк аҕам саастаахтарын «Алгыс» кулууптара биир дойдулаахтарбытыгар үс устуука сиэккэ уонна Павлова Р.Н. чугас аймахтарын кытары анал сиэккэ өрөн ыыттылар.
Сата диэн сиртэн эти түспүт маһыттан Ноговицына Т.Н. аҕалан биэрбитин нэһилиэкпит ууһа Васильев Р.А. моойго кэтэр харысхаллары оҥорон быһан биэрбитин, «Алгыс» эбээлэр кулууптарын чилиэннэрэ аалан-чочуйан тупсаҕай көрүҥнээн сылаас илиилэринэн арчылаан биэрдилэр.
Нэһилиэкпит аҕам саастаахтарын «Алгыс» кулуубун өр кэмҥэ салайан кэлбит Мухоплева З.Н.харысхалларбытыгар анаан мөһөөччүктэрин тигэн биэрдэ, ол мөһөөччүкпүт биир өттүгэр нэһилиэкпит гербэтэ, биир өттүгэр харысхал бэлиэтин биир дойдулаахпыт, «PROFIT» рекламнай агентство — ИП Васильев Э.А. тэрилтэтэ босхо
оҥорон биэрдилэр.
Антоновка орто оскуолатыгар өр сылларга үтүө суобастаахтык үлэлээбит, саха фольклорун үйэтитээччи быһыытынан биллэр, нэһилиэккэ убаастанар киһибит, «Алгыс» түмсүү чилиэнэ Федорова Т.Ф. уолаттарбытыгар бэлэмнээбит сиэккэлэрбитин, харысхалларбытын арчылаан сиэрин — туомун ыытта. «Алгыс» кулууп эбээлэрэ сылаас илиилэринэн бигээн бэйэлэрин баҕа санааларын этэн туран арчылаатылар.
Күндү биир дойдулаахтарбытыгар олохтоох дьаһалтабыт үлэһиттэригэр, чуолаан баһылык солбуйааччытыгар А.М.Ивановаҕа, МБУ БОН исписэлииһэ Н.П.Ивановка, үлэһит уолаттарыгар, «Алгыс» кулууп эбээлэригэр З.Н.Мухоплеваҕа, Т.Н.Ноговицынаҕа, нэһилиэкпит олохтоохторугар уус Р.А.Васильевка, «PROFIT» рекламнай агентство — ИП Э.А.Васильевка, үлэһиттэригэр аҕам саастаах «Алгыс» эбээлэр кулууптарын уонна
А.Я.Овчинникова аатынан «Түһүлгэ» НАДь кэлэктиибин аатыттан улахан махталбытын тиэрдэбит.
А.Я. Овчинникова аатынан «Түһүлгэ» норуот айымньытын дьиэтэ
Читайте нас в:
