Бүгүн өрөспүүбүлүкэ салалтатыгар үлэлээбит, 2010-2018 сылларга Саха сирин Ил Дархана, Федерация Сэбиэтигэр Саха Өрөспүүбүлүкэтин толору боломуочуйалаах бэрэстэбиитэлэ, Федерация Сэбиэтин аграрнай бэлиитикэҕэ уонна айылҕаны туһаныыга кэмитиэтин бэрэссэдээтэлин солбуйааччы Егор Афанасьевич Борисов 70 сааһын туолла. Бу күн өрөспүүбүлүкэ араас муннуктарыттан бииргэ үлэлээбит кэллиэгэлэрэ эҕэрдэ суруктары ыыталлар.

Биллэр судаарыстыбаннай уонна политическэй диэйэтэл Климент Иванов:

«Ытыктабыллаах Егор Афанасьевич, эйиигин 70 сааскын туолар үөрүүлээх үбүлүөйгүнэн эҕэрдэлиибин!

Эн төрөөбүт өрөспүүбүлүкэҥ, норуотуҥ иннигэр үгүс үтүөнү оҥорон, үбүлүөйгүн дьоһуннаахтык көрсөҕүн.

Эн эдэр эрдэххиттэн сатабыллаах хаһаайыстыбаннай улэһит, талааннаах тэрийээччи быһыытынан биллибитиҥ. Онтон  бастакы Бэрэсидьиэн М.Е.Николаев өйөбүлүнэн, кини биир санаалаахтарын уонна хамаандатын эрэллэх кыттааччыта буолаҥҥын, политик, бөдөҥ  политическай деятель буола уунэн тахсыбытыҥ. 2010 сыл бэс ыйыттан Саха өрөспүүбүлүкэтин бэрэсидьиэнинэн талыллыбытыҥ. Эппиэттээх үлэгин чуолкайдык оҥоһуллубут өрөспүүбүлүкэ сайдыытын бырагыраамматын оҥорууттан, ылыныыттан саҕалаабытыҥ. Бэрэсидьиэнинэн үлэгин саҕалыаҥ  иннигэр уһун бириэмэҕэ бырабыыталыстыбаны салайбыт буолан, өрөспүүбүлүкэ сайдыытын кыһалҕаларын учугэйдик билэр этин. Онон Бэрэсидьиэн быьыытынан саҥалыы көрөн, уларытыылары киллэрбитиҥ. Дьон-сэргэ ол уларыйыыларга астыммыта, эрэммитэ. Эн онон салайааччы быһыытынан туспа суоллаах-иистээх, чопчу былааннаах, ону олоххо киллэриигэ дьаһаллаах, киэҥ көрүүлээх политик буоларгын көрдөрбүтүҥ.

Эн административнай үлэҕэ бюрократияны туоратыыга, государственнай сулууспаҕа чиэһинэй, норуокка чугас, урукку көлүөнэ үлэһиттэргэ болҕомтолоохтук сыһыаннаһыыны олохтооһуҥҥа улахан болгомтоҕун уурбутуҥ. Михаил Ефимович Николаев демократическай Саҥа Саха сирин тутар политикатын салҕааччыта буолаҕын. Иккис Бэрэсидьиэн В.А. Штыровтыын өрөспүүбүлүкэ экэнэмиичэскэй сайдыытыгар таһаарыылаахтык үлэлээбиккит. Эн Президент быһыытынан тыа сирин сайдыытыгар аныгылыы рынок экэниэмикэтин ирдэбилинэн табаары оҥорон таһаарыыны кэҥэппитиҥ, субсидиялары, субвенциялары олохтоон, тыа сирэ сайдарыгар саҥа олуктары уурбутуҥ.

Өрөспүүбүлүкэ улуустарыгар, куораттарыгар социальнай эбийиэктэри: оскуолалары, балыыһалары, уһуйааннары тутуу биллэрдик элбээбитэ. Бөдөҥ успуорт эбийиэктэрин тутуу салгыы ыытыллыбыта. Өрөспүүбүлүкэтээҕи, бэдэрээлинэй суоллары тутуу тэтимирбитэ.

Кырдьаҕастарга, бэтэрээннэргэ көмө, кыһамньы улааппыта: туруорсуу, эбии үбүлээһин түмүгэр ылар биэнсийэлэрэ, пособиелара эбиллибитэ. Наставнигын бастакы бэрэсидьиэн М.Е.Николаев төрүттээбит соруктарын ситиһиилээхтик толорбутуҥ. Саха сирин сайдыы суолунан инникигэ хардыылаппытыҥ.

Егор Афанасьевич, норуот интэриэһин көмүскүүр үлэҕэр ситиһиилэри, кытаанах доруобуйаны, дьоллоох олоҕу баҕарабын».