Чурапчы улууһун дьаһалтатын, “Сахабэчээт” судаарыстыбаннай автономнай тэрилтэ уонна олохтоох “Саҥа олох” хаһыат көҕүлээһиннэринэн “Сенаторы кытта биир күн” диэн суруналыыстарга пресс-тур тэрилиннэ. Өрөспүүбүлүкэ суруналыыстара күн устата Арассыыйа Федерациятын сенатора Егор Борисов төрөөбүт, улааппыт дойдутугар тахсан кини олоҕун бэлиэ миэстэлэринэн сырыттылар, астына сэһэргэстилэр, диэн “Саҥа олох” хаһыат суруйар.

Атырдьах ыйын 15 күнүгэр өрөспүүбүлүкэбитин салайбыт, сахалар биир тумус туттар киһибит, күн бүгүн Арассыыйа таһымыгар үлэлии-хамсыы сылдьар, норуотун интэриэһин туруулаһар Егор Афанасьевич Борисов күн сиригэр уол оҕо буолан төрөөн дьоннорун үөрдүбүт күнэ. Бу күн кини оруобуна 70 сааһын томточчу туолар. Манан сиэттэрэн тэриллибит пресс десаҥҥа өрөспүүбүлүкэ сүрүн хаһыаттарыттан, “Саха” НКИХ ханаалыттан суруналыыстар Чурапчыга тиийэн сенатор олоҕор бэлиэ буолбут сирдэринэн сырыттылар. Ол курдук тиийээт бастаан сахалыы сиэринэн саҥа сиргэ кэлбит дьон буолалларынан “Арчы” дьиэтигэр сылдьан алгыс ыллылар, чурапчылар киэн туттар киһилэрин туһунан сэһэн-сэппэн табылларыгар, сырыы этэҥҥэ буоларыгар диэн аал уот оттуллан, алгыс тыла этилиннэ. Чурапчылар ыалдьыттарын арыылаах алаадьынан, саламаатынан, кымһынан айан туттулар.

Дьэ бу кэнниттэн Сахабыт сирин бастакы Ил Дархана Егор Борисов көмүс уйата буолбут, төрөөбүт, сүүрбүт-көппүт олбуоругар тиийдилэр. Манна кинилэри Егор Афанасьевич сайыҥҥы сынньанар сиригэр  улуус баһылыгын социальнай боппуруостарга солбуйааччы Мария Кронникованы кытта күүтэн олорор эбит. Саха дьонун быһыытынан билисиһэн баран, суруналыыстар кини оҕо сааһын туһунан сүрдээх интэриэһинэй кэпсээни истэн, боппуруостарын биэрэн ыйыталаһан, төрөөбүт дьиэтин, тэлгэһэтин  көрдүлэр. Егор Афанасьевич көрдөрөн, урут ханна туох турбутун истиҥник санаан ылан суруналыыстарга билиһиннэрдэ. Кини кэпсээниттэн элбэх интэриэһинэй чахчылары биллилэр, сөхтүлэр даҕаны. Манна даҕатан эттэххэ уһаайба улуус дьаһалтатын бас билиитигэр бэриллэн, манна инникитин каадырдары бэлэмнииргэ оҥоһуллар бырайыактар тэрээһиннэрэ ыытыллыахтаахтар.

Салгыы “Дархан кыһата” диэн ааттаммыт Семен Новгородов аатын сүгэр оскуолаҕа сырыттылар. Манна эмиэ урут истэ илик чахчыларын иһиттилэр. Суруналыыстарга оскуола үөрэнээччилэрэ Настя Сокольникова уонна Виолетта Горохова төһө да долгуйдаллар бэрт чобуотук Егор Афанасьевич олоҕун суолун, кини дьонун-сэргэтин туһунан кэпсээтилэр. Онно анал стендэ ананан барыта бэрт үчүгэйдик оҥоһуллан турар. Оскуола олох баай дириҥ историялаах буоларын, бу оскуола үөрэнээччитэ буоларынан киэн туттан Егор Афанасьевич оскуолатааҕы сылларын, учууталларын ахтан-санаан ааста. Манна уол оҕону иитиигэ аҕа уонна учуутал оруолун туһунан бэртээхэй дакылаат иһиттилэр. Өссө суруналыыстарга оскуола историятын кэпсиир түмэли көрдөрдүлэр. Манна даҕатан эттэххэ, бу оскуолаҕа биир дойдулаахпыт, биллэр худуоһунньук Михаил Носов учууталлаан ааспыт эбит.

Оскуола кэнниттэн өссө көрсүһүү кини аан бастаан үлэтин саҕалаабыт, наһаа истиҥник ахтар “Сельхозтехника” тэрилтэ уһаайбатыгар тиийэн, онно турбут өйдөбүнньүк пааматынньыктар аттыларыгар аһаҕас халлаан анныгар кэпсэтии буолла. Кэпсэтиигэ улуус баһылыга Степан Саргыдаев уонна Егор Афанасьевич бастакы начальнига, наставнига Дмитрий Еремеевич Захаров кыттыыны ыллылар. Манна Егор Афанасьевич аҕата, бэйэтэ уонна бырааттара үлэлээн-хамсаан ааспыттар. Ол бэлиэтэ үс өйдөбүнньүк пааматынньыктар тураллар. Бастакы стелланы аҕата 1967 сыллаахха оҥорбут, ол кэннэ кэккэлэһэ бастакы тырахтарыыстарга уонна суоппардарга анаммыт ХТЗ уонна Горьковскай собуокка оҥоһуллубут грузовой массыына урукку сыллары саната, кинилэр күүстэригэр, көмөлөрүгэр убаастабыл бэлиэтэ буолан туруоруллубуттар.

Түмүктүүр көрсүһүү, кэпсэтии бибилэтиэкэ-архыыпка буолла. Бу саҥа тутуллан киирбит улуус бибилэтиэкэтин иккис этээһигэр 2016 сыллаахха тэриллибит Егор Борисов аатынан бибилэтиэкэ -архыып бэрт тупсаҕайдык оҥоһуллубут. Манна кини кэбиниэтигэр 80-90 сылларга тутта сылдьан суруммут блокноттарын бары да интэриэһиргээн көрдүлэр.  Егор Афанасьевич бибилэтиэкэҕэ 3800 кинигэни, 590 сувениры, 107 хартыынаны биэрбит. Бибилэтиэкэ матырыйаалларынан саҥардылла турар диэн эттилэр. Сырдык саалаҕа олорон суруналыыстар дьэ түмүктүүр кэпсэтиилэрэ тэрилиннэ. Ким баҕарар бэйэтин илдьэ сылдьар боппуруоһун биэрэн эппиэти ылла. Арассыыйа Федерациятын сенатора тыа хаһаайыстыбатыгар, кадры иитиигэ, олохтоох бэйэни да салайыныы, бэйэтин тус олоҕор да туһааннаан бэриллибит боппуруостарга аһаҕас эппиэттэри биэрдэ.

“Мин ханна да сырыттарбын дьону-сэргэни кытта көрсөрбүн олус сөбүлүүбүн. Кинилэр да астыналлар уонна күүтэллэр. Ханнык баҕарар норуот дьолун бэйэтэ оҥорор. Дьоммутун-сэргэбитин түмүөхпүтүн наада. Дьиҥнээх геройдар тыа сиригэр олороллор. Кинилэри сырдатан, киэҥ эйгэҕэ билиһиннэриэххэ наада.  Киһи хаһан баҕарар эппиэтинэстээх буолуохтаах. Эппиэтинэс баар буоллаҕына, ханнык баҕарар боппуруос быһаарыллар. Итини сэргэ мин төрөппүттэрим киһини туһунан хаһан да куһаҕаннык санаабат, куһаҕаннык саҥарбат уонна киһиэхэ куһаҕаны оҥорума диэн үөрэппиттэрим, олоҕум биир сүрүн бириинсибин быһыытынан илдьэ сылдьабын.  Киһи киһи быһыытынан чочуллан тахсар кэмигэр бэйэтигэр приницптэри үөскэтэр,  бэйэтин өйүнэн-санаатынан. Мин олорорум тухары ол бириинсиптэрбин уларыппатаҕым  ол мин кыайыым уонна тирэҕим буолар”, — диэн Егор Афанасьевич санаатын тириэртэ  уонна суруналыыстарга махтанан, айымньылаах үлэни баҕарда.