Саха сирин балыксыттарын Руслан Мохначевскай кэриэһигэр ыытыллыбыт өрөспүүбүлүкэтээҕи аһаҕас күрэхтэһии түмтэ. Кинилэр биир түүн устата 40-тэн тахса маанылаах хатыыс балыгы хаптардылар. Быраабыла быһыытынан, хаптарбыт хатыыстарын төттөрү өрүскэ ыыппыттар диэн кэпсиир «Эҥсиэли» хаһыат.

“Киэн туттар убайбыт Мохначевскай Руслан Николаевич кэриэһигэр ыытыллыбыт күрэхтэһиигэ 30 киһи кыттыыны ылла. Балыктааһын таһыма үрдээн иһэрэ кыттыан баҕалаах киһи ахсааныттан көстөр.

Быйыл хатыыска балыктааһыҥҥа 70-80 кэриҥэ киһи кыттар баҕалааҕын биллэрбитэ. Ол эрээри, 100 киһи балыктыырыгар сөптөөх сир-уот чугас эргин суох. Инникитин бу боппуруоска үлэлэр ыытыллыахтара”, – диир булчуттар уонна балыксыттар Намнааҕы сэбиэтин председателэ Иван Яковлев.

Хатыыс балыкка быйылгы күрэхтэһии Руслан Мохначевскай 70 сааһыгар ананна. СӨ айылҕа харыстабылын туйгуна Руслан Николаевич Нам улууһугар булт инспекторынан таһаарыылаахтык үлэлээбитэ. Ол курдук, кинини хас биирдии булчут, балыксыт сиэрдээх, үлэтигэр бэриниилээх инспекторынан сыаналыыра. Норуот кинини “Махно” диэн аатынан билэрэ уонна убаастыыра.

Балык булда күн-дьыл туругуттан улахан тутулуктаах. Былырыын күрэхтэһээччилэр дьүкээбил уотун аннынан балыктаабыт эбит буоллахтарына, 2024 сылга чуумпу түүн турбутун Иван Васильевич бигэргэтэр. Биэрэктэн хатыыс балыгы закидушканан хаптарыыны Дьокуускай, Аллараа Бэстээх, Булгунньахтаах (Хаҥалас), Бэрдьигэстээх, Тыайа (Кэбээйи), Эбээн Бытантай балыксыттара 20.30 ч саҕалаабыттар. Күрэхтэһии саҕаламмыта 10 мүн. ааспытын кэнниттэн 2 Хомустаахтан Иван Протопопов киилэ 200 г ыйааһыннаах хатыыһы хаптаран анал аат хаһаайынан ааттаммыт.

“Быраабыла быһыытынан, хаптарбыт хатыыстарбытын төттөрү өрүскэ ыыппыппыт. Быйылгы балыктар улахаттарынан үөртэ”, – диир Иван Васильевич.

Кэрэ аҥаардарга кыайыылааҕынан Граф Биэрэгиттэн Ирина Слепцова ааттаммыт. Иккис миэстэҕэ Дьокуускайтан Елена Кондакова, үһүскэ Евгения Кондрашова тахсыбыттар. Кыайыылаахтар сыаналаах бириистэринэн, мэтээллэринэн наҕараадаламмыттар.

Эр дьоҥҥо алта бастыҥҥа Партизантан Станислав Соловьев, Дьокуускайтан Петр Габышев, Аппааныттан Дмитрий Захаров, 2 Хомустаахтан Иван Протопопов, Булгунньахтаахтан Николай Лукшин, Граф Биэрэгиттэн Филипп Ефимов киирэллэр.

Хатыыс күрэхтэһиитин былырыыҥҥы муҥутуур кыайыылааҕа буоларын дакаастаан Горнай улууһуттан Дьулустан Платонов тахсыбыт. Дьулустан Платонов бу көрүҥү өссө төгүл баһылаабытын, балыктыыр ньымата уратытын дакаастаабыт. 2024 сыл муҥутуур кыайыылааҕар Руслан Мохначевскай бииргэ төрөөбүт быраата Лонгин Николаевич дьиэ кэргэнэ туруорбут убаһа бирииһинэн наҕараадаламмыт.

Күрэхтэһии тыҥааһыннаахтык, интэриэһинэйдик табыллан ыытылларыгар тэрийсибит кэргэнигэр, оҕолоругар, бииргэ төрөөбүттэригэр, чугас доҕотторугар махтаналлар. Бириис туруоруутугар күүс-көмө буолбут Руслан бииргэ төрөөбүт быраата Вячеслав Николаевичка, Лонгин Николаевич дьиэ кэргэнигэр, СӨ Илин Сибиирдээҕи Росрыболовство салайааччыта Николай Кучеровка, кини солбуйааччытыгар Эдуард Родионовка, улуустааҕы спорт управлениетын салайааччытын солбуйааччыта Софронов Сергей Анатольевичка, доҕоро Иннокентий Яковлевка истиҥ тыллары аныыллар.

Харысхан Попов