Бүлүү улууһун Халбаакы нэһилиэгэр кэлиҥҥи түөрт сылга элбэх оҕо кикбоксинг курдук спорт көрүҥүнэн сөбүлээн дьарыктанар буоллулар. Ситиһиилэр да бааллар, Халбаакы эдэр кикбоксердара Саха өрөспүүбүлүкэтигэр биллэр-көстөр, күрэхтэһиилэргэ кыттар, кыайар буолан бардылар, диэн «Олох суола» хаһыат суруйар.

Кинилэртэн биир бастыҥнарынан 16 саастаах Аман Иванов буолар. Саха Өрөспүүбүлүкэтигэр 45 киилэ ыйааһыҥҥа бастаабыта, Уһук Илин уокурукка, Арассыыйаҕа бастыыр күрэхтэһиилэргэ киирсибитэ.

Сытыы, түргэн хамсаныылаах Аман Иванов Уһук Илин федеральнай уокурукка бастыыр күрэхтэһиигэ ыйааһыныгар Данил Шадриҥҥа тэҥ киирсиигэ кыайтарбыта. Арассыыйа эдэрдэргэ чемпионатыгар эмиэ киниэхэ хотторон турардаах.

Аман элбэхтик эрчиллэн, тулуурун, дьулуурун көрдөрөн, Саха сирин сүүмэрдэммит хамаандатыгар бастакы нүөмэринэн киирэри ситиспитэ уонна «Азия оҕолоро» VIII Оонньууларга кыттар кыахтаммыта.

«Азия оҕолоро» VIII норуоттар икки ардыларынааҕы спортивнай оонньууларын кикбоксиҥҥа күрэхтэһиилэрэ Дьокуускай куорат «Сулус» комплексыгар тэриллибиттэрэ. Алексей Васильев баһылыктаах Халбаакы дьаһалтатын үлэһиттэрэ, спорду таптааччылар баһылык кабинетыгар мустан уоллара Аман киирсэрин көрбүттэрэ, бэйэлэрин уолларыгар «ыалдьыбыттара».

Аман бастакы киирсиитигэр сэрэбэйинэн иккитэ хотторбут Данил Шадриныгар түбэспитэ. Тириэньэрин кытта хайдах киирсэрин сүбэлэһэн баран, дьэ, рингэҕэ тахсар. Урут хайдах хотторбутун билэр буолан кытаанах киирсиигэ, илиитинэн элбэхтик үлэлээн, тулуурун, кыайыыга дьулуурун көрдөрөн, Аман өрөгөй кыайыыны ситиһэр! Төһө үөрбүтэ буолуой?

— Финалга Урал федеральнай уокуругун кикбоксерун кытта көрсүбүтүм. Бастакы киирсиибинээҕэр чэпчэки, утарылаһааччым атахтара түргэн этэ. Мин элбэхтэ туттар комбинацияларбынан киирсибитим, — диэн «Азия оҕолоро» VIII аан дойдутааҕы спортивнай оонньууларын кикбоксиҥҥа чемпиона Аман Иванов кэпсээтэ.

Аман төрөппүттэрэ Айартаана Гаврильевна уонна Станислав Дмитриевич уоллара спордунан кыра эрдэҕиттэн дьарыктанарын кэпсээтилэр.

— Бастаан кыратыттан тустуунан сөбүлээн дьарыктанара, Халбаакыга сиэксийэ сабыллыбытыгар туга да суох хаалбыппыт. Онтон 2020 сыллаахха күһүн Артур Александрович оскуолаҕа физругунан үлэлии кэлбитэ уонна кикбоксинг сиэксийэтин арыйбыта. Аман онно сөбүлээн дьарыктанан барбыта. Уолбутун өйүүбүт, — диэн ийэтэ Айартаана Гаврильевна билиһиннэрдэ.

Улахан ситиһии барыта тириэньэртэн тутулуктаах. Аман тириэньэрэ Артур Васильев Мэҥэ Хаҥаластан төрүттээх, урут боксанан, аҕата тириэньэр буолан, утумнаахтык дьарыктаммыт. Онтон аармыйаҕа сулууспалыы сылдьан рукопашнай киирсии көрүҥүнэн үлүһүйбүт, кэлин кикбоксиҥҥа көспүт.

— Аман дьарыгын сөбүлүүр, саамай кылаабынайа, кини дьиссипилиинэлээх. Киирсэ сылдьан былааммытын толорор, киһи эппитин истэр, атын оҕолор эмоцияҕа киирэн хааланнар мээнэ охсуһан бараллар. Аман толкуйдуур, киирсэригэр төбөтө үлэлиир, туруорбут сорукпутун толоро сатыыр. Хас биирдии ситиһии бэйэҥ туруккуттан, дьиссипилиинэҕиттэн тахсар. Аман бэйэтэ киһи быһыытынан сэмэй, онон, кыайдым-хоттум диэн «сулус» буолан барбат, — диэн тириэньэрэ Артур Александрович иитиллээччитин хайҕаан кэпсээтэ.

Аман спорду уонна үөрэҕи сөпкө дьүөрэлиир. Нэдиэлэҕэ алтата дьарыктанар спортсмен үөрэҕэр үчүгэйдэр ахсааннарыгар сылдьар.

Ити курдук, элбэх сыллаах утумнаах эрчиллии, дьарыктаныы, кыайыыга дьулуурдаах буолуу түмүгэр Аман Иванов «Азия оҕолоро» VIII спортивнай оонньууларкикбоксиҥҥа чемпионунан буолла.

Николай Куприянов