Бэс ыйын 20-22 күннэригэр Үөһээ Бүлүүтээҕи №4 Д. С. Спиридонов аатынан орто оскуола үөрэнээччилэрэ — «Дьэрэкээн» фольклорнай бөлөх Аммаҕа Олоҥхо ыһыаҕар кыттыыны ылан кэллэ. Салайааччылара Валентина Семенова — айар куттаах Далбар Хотун, Саха сиригэр уонна улууска биллэр ааттаах-суоллаах оһуохайдьыт, тойуксут.

Кини сылы быһа оҕолору кытта алтыһан, сахалыы тыыны кинилэргэ иҥэрэн, бэрт утумнаахтык дьарыктаата. Оҕолор биир да күнү көтүппэккэ олоҥхо толоруутугар, оһуокайы этиигэ, тойугу туойууга үөрэннилэр.

Салайааччы Валентина Семенова бэйэтэ айбыт «Куоппат-куойбат Куттаҕаһа суох Күн Дибилитэр бухатыыр» олоҥхотун оҕолорго үөрэтэн, дьон-сэргэ сыанабылыгар таһаарда. Оҕолор киһи санаатын хоту бэлэмнэнэн Олоҥхо ыһыаҕар бэйэлэрин көрдөрөн, дьонтон истэн-үөрэнэн таһымнара үрдээн кэллэ.

Кэрэ айылҕалаах Амма ыһыаҕар сайыҥҥылыы куйаас күннэр туран биэрдилэр. Түһүлгэҕэ тиийээт Абаҕа нэһилиэгин ураһатыгар түстүбүт. Хонуктаах сирбит «Радуга» диэн оҕо уһуйаана. Онон утах ханнарар тэлгэһэлээх, утуйар уубут биһиктээх буолан биһиги ыһыахпытын өрө көтөҕүллүүлээх, сиэр-майгы быһыытынан үөрэн-көтөн атаардыбыт. Бастакы күммүтүгэр оҕолорбут биир улахан тэрээһиҥҥэ кытыннылар. Биһиги биир дойдулаахпыт биллэр сэһэнньит, суруналыыс, тыл үөрэҕин билимин кандидата Анатолий Николаевич Павлов — Дабыл Сэһэн түһүлгэтин арыйыытыгар «Дьэрэкээн» бөлөхпүт арыалдьыт быһыытынан кыттыыны ылла. Иккис күммүтүгэр олоҥхолорун ыллаан-туойан көрдөрдүлэр. Араас улуустартан кыттааччы элбэх. Икки күнү быһа 79 олоҥхо толоруутун жюри иһиттэ. Биһиги олоҥхоһуттарбыт улахан курэххэ бастакы кыттыылара. Оҕолор кыһаллан туран олоҥхону толордулар. Олоҥхо авторын толорооччу Яковлев Динасий хайҕанна. Салгыы «Дьэрэкээн» бөлөҕү кыһын Дьокуускай куоракка буолар олоҥхоһуттар күрэхтэригэр ыҥырдылар.

Биир ураты умнуллубат түгэн — Сахабыт сирин президенын, биир дойдулаахпытын Айсен Сергеевич Николаевы кытта көрсүһүү буолла. Президеммытын Олоҥхо ыһыаҕар оҕолор эмискэ көрсө түһэн долгуйан ыллылар.

Дойдум дьоно — аймахтарбыт кэриэтэ диэн дэлэҕэ да эппэттэр. Айсен Сергеевич оҕолору кытта эйэҕэстик кэпсэтэн сүргэлэрин наһаа да көтөхтө. Оҕолорбут итинник соһуччу көрсүһүүттэн үөрүүлэрэ сүрдээх.

Аммалар олоҥхо ыһыаҕын киһи сэргиир гына тэрийдилэр. Итии аһылыгы, сымнаҕас утуйар орону тэрийбит оҕо кыһатын үлэһиттэригэр, ыһыах түһүлгэтигэр сахалыы минньигэс аһынан күндүлээбит Абаҕа нэһилиэгин үтүө-мааны дьонугар барҕа махталбытын тириэрдэбит! Оҕолорбутугар уонна Валентина Владимировнаҕа салгыы ситиһиилэри баҕарабыт!

Корякина А. А.