Норуоттар икки ардыларынааҕы “Азия оҕолоро” спортивнай оонньууларга 24 араас дойдуттан спортсменнар кэлэн ХИФУ базатыгар тэриллибит “Спортсменнар дэриэбинэлэригэр” түһэн олороллор. Кинилэри кытта өссө Уһук Илин, Сибиирдээҕи уонна Ураллааҕы федеральнай уокуруктартан, итини сэргэ Москва куораттан хамаандалар бааллар. «Амма олоҕо» хаһыат суруналыыстара манна тиийэн, ыалдьыттары көрсөн кэпсэттилэр, хайдах-туох олороллорун ыйыталастылар.
“Спортсменнар дэриэбинэлэригэр” киирэргэ кытаанах хонтуруолу ааһаҕын. Манна мээнэ киирбэккин. Биһиги Бейджикпитин анал тэрилгэ даҕайан, киирэргэ көҥүл биэрэр күөх уот умайар. Онтон аэропортка киирэр курдук анал турникетынан ааһаҕын. Суумкаҥ иһин кытта бэрэбиэркэлээн эмиэ анал сиринэн аһардан мониторунан көрөллөр. Бу барыта ыалдьыттарбыт, спортсменнар куттала суох олороллорун хааччыйар. Көрсүбүт хамаандабыт үксүлэрэ нууччалыы да, английскайдыы да үчүгэйдик билбэттэр. Бэйэлэрин эрэ тылларынан кэпсэтэллэр. Ол биирдэ санаан көрдөххө, эмиэ сөп курдук дии. Тыл баар буоллаҕына, норуот баар буолар буоллаҕа.
Монголияттан сылдьар спортсмен олох нууччалыы билбэт гынан баран, английскайдыы кыратык билэр эбит. Онон илиинэн көмөлөһүннэрэн син кэпсэттибит. Аата Тимучин диэн. 15 саастаах, хапсаҕайга 50 киилэҕэ тустуохтаах. Бу көрүҥҥэ бэһиэбит диэн буолла. Улан Баторга сылдьыбыппыт диэбиппитигэр олус үөрдэ, уруурҕуу көрдө. Хапсаҕайынан дьарыктаммыта аҕыйах сыл буолбут. Усулуобуйа бэртээхэй диэн эрбэҕин көрдөрдө.
Сибэкки тутуурдаах, кыһыл формалаах хамаанда иһэрин көрөн, тохтотон кэпсэпиппит Белорусь хамаандата харбааһынтан кыайыы көтөллөөх кэлбит. Онон кинилэргэ мэтээл биэриэхтэрин иннинэ сибэкки туттарбыттар. Кэпсэппит уолаттар, Матвей Данилов уонна Тимур Каренков харбааһынынан кыра эрдэхтэриттэн дьарыктаналлар эбит. Биирин аҕата дьарыктыыр. Тимур көҥүл стилинэн харбааһыҥҥа 100 миэтэрэҕэ үһүс, Тимур баттерфляй стилинэн 200 миэтэрэни харбааһыҥҥа икки миэстэлэри ылбыттар. Көрдөрүү өссө үчүгэй буолуохтаах этэ, кыра тиийбэтэ дииллэр. Көҥүл стилгэ бастакы миэстэни Москваттан Матвей Нестеров ылбыт, баттерфляйга эмиэ Москваттан Егор Прошин чемпионнаабыт. Утарылаһааччыларын уолаттар кыратык да буоллар билэбит дииллэр. Манна даҕатан эттэххэ Белорусь хамаандата быйыл аан бастакытын “Азия оҕолоро” оонньууга кыттар. Онон көрүҥҥэ барытыгар бэрэстэбиитэллэри аҕалан улахан халыҥ хамаанда буолар.
“Саха сирин дьоно наһаа эйэҕэстэр эбит. Биһигини ханна да буоллун олус үөрэ көрсөллөр. Олорор усулуобуйабыт үчүгэй, уопсайынан барыта “туйгун”. Кэлиэхпит иннинэ Саха сиригэр алмаас хостонор уонна тымныы диэн билэр этибит. Онньуулары аһыллыыларын астынныбыт. Онно олохсуйбут эйгэ олох ураты этэ. Ону сөбүлээтибит аҕай”, — диэн уолаттар санааларын үллэһиннилэр уонна кыайбыттарыгар туттарбыт бэлиэ сибэккилэрин утары уунан букатын да соһуттулар.
Күннээх Узбекистан уоллаттара биир нууччалыы үчүгэйдик саҥарар уолларын аҕалан бэркэ кэпсэттибит. Көрсүбүт эдэр спортсменнарбыт греко-римскэй тустууга күрэхтэһиэхтээхтэр эбит. Бары Узбекистан чемпионнара, араас ыйааһыҥҥа барытыгар бааллар. Саха сирэ олус истиҥник көрсүбүтүн, дьоно аламаҕайдарын бэлиэтииллэр. Узбекистан хамаандата Оонньуулар үһүс күннэрин түмүгүнэн бастыҥнар ахсааннарыгар сылдьар.
“Үчүгэй баҕайы усулуобуйалаах сиргэ түһэрдилэр. Аспыт да минньигэс. Баран дьарыктанар да сирбит эмиэ табыгастаах, бэртээхэй. Онон барыта үчүгэй. Аны кыайыыга эрэ дьулуһабыт”, — дииллэр уолаттар.
Манна кэлэн Монголия, Азербайджан, Белоруссия хамаандаларын кытта билсибиттэр. Билигин сөрүүн күннэр туралларын, кинилэргэ 50 кыраадыс сылааһын этэллэр. Ол гынан баран этэргэ диэри сылаас сыһыан ханнык да сөрүүн күнү биллэрбэт буоллаҕа.
“Амма олоҕо” хаһыат
Читайте нас в:
