Августа Николаевна Слепцова Харбалаах орто оскуолатын үөрэнэн бүтэриэҕиттэн ыла төрөөбүт-үөскээбит Дьохсоҕонугар, оҕо уһуйааныгар харыс да халбарыйбакка, түөрт уон сыл устата эҥкилэ суох үлэлээбитэ. Кини оҕолорго биир тэҥ сыһыаннаах, болҕомтолоох, кыһамньылаах буолан, хас да көлүөнэ оҕолор тапталларын, төрөппүттэр ытыктабылларын, хайҕалларын, махталларын ылбыта. Дьохсоҕон уһуйааныгар хойукааҥҥа диэри оҕолор нэдиэлэ биэс хонугун устата хоно-өрүү сылдьалларыгар Айыыһыт курдук араҥаччылыыр тапталлаах ньээньэлэрэ баар буолан түргэнник үөрэнэллэрэ, эрэллээхтик сылдьаллара.
«Оҕо уһуйааныгар сылдьыбыт оҕолорум төһө да улаатан, бэйэлэрэ үлэһит, ыал ийэлэрэ-аҕалара буолбуттарын иһин, миэхэ санаабар өрүү оҕолор курдуктар», — диир Августа Николаевна.
Августа Николаевна Дьохсоҕон биир бастыҥ ыала Мария Иннокентьевна уонна Николай Иосифович Слепцовтар сэттэ оҕолоох улахан дьиэ кэргэннэригэр оҕо эрдэҕиттэн үлэҕэ эриллэн улааппыта. Дьиэ, сүөһү көрүүтэ, от-мас үлэтэ – тыа сирин дьонугар оччоттон баччаҕа диэри үлэ элбэх буоллаҕа. Августа Николаевна кһн бүгүнүгэр да сүөһүлээх-астаах, үрүҥ илгэни үрүлүтэ сылдьар. Ийэлээх аҕалара оҕолорун үлэҕэ, бэрээдэккэ, бэйэни көрүнэргэ-харанарга уһуйан-такайан, бэйэлэрэ, дьиэлэрэ өрүү чэбэр, ыраас, бары-барыта орун-оннугар, чуумпу, элбэх киһи араллаана биллибэт эйэлээх, үтүө эйгэлээхтэрэ. Дьохсоҕоҥҥо хойуккааҥҥа диэри бэкээринэ диэн суоҕа. Онон ыал барыта илиискэ, халыыпка килиэп астаналлара. Августа ийэтин кытта килиэби, баахыланы, алаадьыны, атын да бурдук аһы астыыллара. Сайынын күөстэнэр дьиэҕэ оһох оттон онно астаналлара. Сэппэрээтэринэн үүт эрийэллэрэ. Ийэтин көрө сылдьан өссө оскуолатааҕы сылларыттан саламаат астыырга үөрэммитэ. Онтон ыла саламааччыт бэрдэ. Араас тэрээһиннэргэ оҕо уһуйаанын асчыта Евдокия Захароваҕа көмөлөһөн саламаат астыыра. Бөһүөлэккэ буолар араас бэлиэ түгэннэргэ көрдөспүттэригэр бөдөҥ соболору да ыһаарылаан, хаан да кутан, саламаат да астаан күүс-көмө буолбута баһаам. Биэс сыллааҕыта улуустааҕы асчыттар түһүлгэлэригэр Августа Николаевна саламаата бастыҥ саламаатынан билиниллибитэ.
Августа Николаевна кэлин Байдам, Сыдьаайа Филипповтар «Тирэх билии» үөрэхтэригэр үөрэнэн олоҕор туһанар, ылбыт билиитин үллэстэр, арчылыыр. Бу үүммүт Үрүҥ Тунах Ыһыах күннэригэр дьиэ кэргэни, ыалдьыттары саламаатынан күндүлүүргэ киниттэн саламааты хайдах астыырын ыйыталастым. Хобордооххо ынах арыытын уулларан, тууһун кутан, онтон бурдугу кыра кыралаан кута-кута бөлүөх буолбатын курдук буккуйаҕын. Арыы саламаат үрдүгэр тахсан кэллэҕинэ кыра кыратык уу кутан иһэҕин.
Августа Николаевна сылгы иҥииринэн кымыстыыр. Иһит аҥарынан ыаммыт үүтү, иһит аҥарынан оргуйан сойбут ууну кутар, кыратык саахардыыр, ытыгынан ытыйар уонна сылаас сиргэ уурар. Кэмиттэн кэмигэр ытыйан буккуйар. Хас да хонугунан быыппах бэлэм буолар.
Августа Николаевна Слепцова сүбэтин тускутугар туһаныҥ, саламаат астыырга, кымыстыырга-быыппахтыырга холонуҥ.
Валентина Бочонина
Читайте нас в:
