Саха сиригэр физическэй култуура уонна успуорт сайдыытыгар сүҥкэн өҥөлөөх Николай Тарскай төрөөбүтэ 100 сылын үөрүүлээхтик бэлиэтээһин үрдүк таһымнаахтык ыытылынна.
Кэрэ бэлиэ тэрээһиҥҥэ биһиги чулуу киһибит Николай Николаевич Тарскайы саха спордун аҕатынан билинэр, сүдү талааныгар, ыыппыт үлэтигэр сүгүрүйэр, үтүө аатын кэриэстиир, этэргэ дылы кини көҕүлээһинин, тэрийиитин ылынар дьон бу кэрэ бэлиэ түгэҥҥэ көхтөөхтүк кыттыбыттарын бэлиэтиир тоҕоостоох.
Үбүлүөйдээх тэрээһиннэргэ кыттыбыттар, Николай Николаевич хайдах курдук тэрийэр талааннааҕын, биир санаалаахтарын мунньан улахан хамсааһыны оҥорбутун сөҕөн-махтайан, чахчы даҕаны бэйэтин кэмигэр физическэй култуура, успуорт сайдыытыгар элбэх саҥаны, сонуну киллэрбит салайааччы буоларын бары киэн туттан туран эттилэр.
Арассыыйа физическэй култуураҕа уонна успуорка үтүөлээх үлэһитэ, Саха АССР норуотун хаһаайыстыбатын үтүөлээх үлэһитэ, 1977-1986 сс. Саха сирин спордун тэрилтэтин салайбыт Д.П. Коркин аатынан Саха Өрөспүүбүлүкэтин спорт эйгэтигэр Судаарыстыбаннай бириэмийэтин лауреата Афанасий Алексеев, саха чаҕылхай уола, успуорт талааннаах салайааччыта Н.Н. Тарскай аата саха тыллаах баарын тухары ааттана туруоҕа, кини оҥорбут дьыалата үйэлэргэ умнуллуо суоҕа диэн этэн туран, саҥа бэчээттэнэн тахсыбыт «Николай Тарскай» диэн кинигэни хомуйан оҥорооччуларга: Саха Өрөспүүбүлүкэтин култууратын туйгуна, оҕону олоҥхоҕо уһуйуу маастар-педагога Наталья Мордовскаяҕа уонна «Дьулурҕан» хаһыат эрэдээктэрэ, Саха Бэчээтин туйгуна Петр Павловка – бэйэтэ анаан сакаастаан оҥотторбут мэтээллэрин үөрдэ-көтүтэ кэтэрдиитэ, соһуччу үөрүүлээх буолла.
Мэтээллэр кэннилэригэр «Спорт уһулуччулаах тэрийээччитэ Н.Н. Тарскай туһунан бэртээхэй кинигэни бэлэмнээн таһаарбыккытынан» диэн анал суруктаах.
“Дьулур5ан”
Читайте нас в:
