Казахстаҥҥа Саха Өрөспүүбүлүкэтин күннэригэр Хаҥаластан хас да маастар, ол иһигэр Кыһыл Үрүйэттэн Дарья Константинова, Евдокия Антипина, ону сэргэ култуура үтүөлээх үлэһитэ, «Эркээни эдэр сааһа» норуодунай кэлэктиибин салайааччыта Василиса Романова, урбаанньыт Саргылаана Константинова кытта сылдьаллар, диэн «Хаҥалас» хаһыат суруйар.

Астанаҕа Олоҥхо тыйаатыра К. Куанышбаев аатынан музыкальнай драмтыйаатыра Н.П. Бурнашев-Боодьоҕос олохтотунан испэктээкили туруорда. Онно култуура миниистирэ Афанасий Ноев көрөөччүлэргэ тыл эттэ. Бу испэктээкил муус устар 21 күнүгэр аны Алматыга М.Ю. Лермонтов аатынан нуучча Национальнай академическай тыйаатырыгар турда. Санатан этэр буоллахха, бу Саха сирин күннэрэ Казахстан сиригэр дойду Президенэ Касым-Жомарт Токаев СӨ Баһылыга Айсен Николаевы кытары 2023 сыллаахха үөрэҕирии, култуура, экономическай сибээстэһиилэргэ Сөбүлэһии чэрчитинэн ыытылынна.

Биһиги биир дойдулаахтарбыт Астанаҕа Национальнай музейга «Сокровище Якутии» айар быыстапкаҕа кытыннылар. Кыһыл Үрүйэбит далбар хотуттара эриэккэс саха дьонун кэрэ оҥоһуктарын, ол иһигэр бэйэлэрин киэнин көрдөрдүлэр, үөрүүлээх быһыыга-майгыга быыстапка арыллыытыгар кытыннылар. «Ньургун Боотур» Астана балет тыйаатырыгар Андрей Борисов туруорбут оператыгар сылдьыбыттарын биллэрдилэр.

«Ситиһии бөҕө, астыныы улахана!» диэн иһитиннэрдэ Дарья Константинова уонна кэллэхпинэ кэпсэтиэҕим диэн эрэннэрдэ. Опера арыллыытыгар Ил Дархаммыт Айсен Николаев, Казахстан премьер-миниистир солбуйааччыта Серик Жумангарин көрөөччүлэри эҕэрдэлээбиттэрин эттэ.

Людмила Мордовская