Спорт кыһыҥҥы көрүҥнэригэр Саха сирин V спартакиадатын биир дьоруойунан эр дьон биатлонугар кылбар кыайыыны ситиспит спорт маастара Николай Максимовы ааттыахха сөп.
Кини 9 км дистанцияҕа утарсааччытын Михаил Соснины баара-суоҕа биир сөкүүндэнэн баһыйан, спартакиада кыайыылааҕынан буолла. Бастаан-утаа бу сүүрүүгэ ким кыайбытын быһаарыыга мөккүөр үөскүү сылдьыбыта. Түмүккэ Николай Максимов бириэмэтэ – 0:27:01, онтон Михаил Соснин (Алдан) – 0:27:02. Бу дистанцияҕа үһүс бириистээх миэстэни Максим Бочкарев (Нерюнгри, 0:29:36) ылла.
— Николай, дьэ, эҕэрдэ! Биатлон спринигэр хатыһыылаах киирсии буолла. Эн бэйэҥ спортсмен киһи бу кыайыыгын хайдах сыаналыыгыный? Сүүрүү иннинэ уонна кэнниттэн балаһыанньа хайдах этэй? Ким кыайбытын тута быһаарыыга хайдыһыылар бааллара дии.
— Эҕэрдэҕит иһин улахан махтал! Бэйэм кыттыыбар 4 сыананы туруоруом этэ. Бэлэмнэниим орто соҕус. Быйылгы дьарыгым ситэтэ суох диэххэ сөп. Ордук ытыыбар кыһалла сатаабытым. Сытан эрэн ытыыга барытын таппыт эбит буоллахпына, туран эрэ ытыыга иккитэ сыыстарбытым. Итиннэ дроҥҥа мэһэйдэппитим.
Михаил Соснин республика хайыһарга бастакы нүөмэрдээх спортсмен буоллаҕа. Ол иһин кини эрдэттэн түргэнник ыта-ыта түргэнник сүүрүөхтээх этэ. Мин сыалым: үчүгэй сүүрүү уонна ытыы.
Бүтэһик эргииргэ бириэмэбинэн кыайан испитим. Онтон бүтэһик эргиир иһигэр хотторон иһэҕин диэн хамаанданы истибитим. Онно секундомер тутааччылар биир сөк. хойутаан туппут буолуохтарын сөп. Мин санаабар, ол иһин, Соснин тренерэ мөккүспүт буолуохтаах. Арай, чибынан сүүрбүппүт буоллар, итинник мөккүөр суох буолуо этэ.
Михаиллыын сыһыаммыт үчүгэй, доҕордуубут. Күүстээх утарсааччы. Ити иннинэ кини бэйэтин көрүҥэр иккитэ бастаабыта. Онтон үһүс күнүгэр биир сөк. хотторон, кыһыйбыт аҕай буолуохтаах. Онтон-антах спартакиада үс төгүллээх чемпиона буолуо этэ. Санаатын биллэрбэтэҕэ, кэлэн эҕэрдэлээбитэ уонна: «маастар буоллаҕыҥ дии, кыайарыҥ сөп» диэбитэ.
— Николай, бэйэҥ тускунан билиһиннэр эрэ. Билигин тугу дьарыктанаҕын, ханна үөрэнэҕиний?
— Амма улууһугар Сулҕаччы нэһилиэгэр төрөөбүтүм. Дэриэбинэбит наһаа улахана суох, 500-чэкэ олохтоох. Билигин Башкирияҕа Стерлитамак куоракка үөрэнэ сылдьабын. Физическэй култуура коллеһыгар. Быйыл бүтэһик курсум. Спорка инники былааным туһунан эттэххэ, муус устар 13-14 күннэригэр Алдаҥҥа марафон буолар. Онно кыттыаҕым, эр дьоҥҥо 50 км дистанцияҕа.
— Маннык ситиһиигэ биһиги бастатан туран, бастакы уһуйааччыларбытын санаан ылыахпытын наада. Эн маннык таһымнаах спортсмен буолан тахсаргар кимнээх ииппиттэрэй?
— Оо, элбэх буоллаҕа дии. Улахан махталбын тренердэрбэр тиэрдэбин. Бастакы тренербэр Алексей Ильич Никифоровка, иккис тренербэр Алексей Егорович Бурнашевка, Анатолий Афанасьевич Артемьевка махтанабын. Уонна Эдуард Васильевич Ефимовка, миигин өрүү өйүүрүн иһин махтанабын.
— Николай, бу тыа сирин оҕото тоҕо чопчу биатлон курдук спорт сэдэх көрүҥүн талбыккыный?
— Бастакы тренердэрим кыра эрдэхпиттэн биатлоҥҥа дьарыктаан киирэн барбыттара. Кыра сылдьан сүүрүүнэн, тустуунан эрчиллэ сылдьыбытым. Бииргэ төрөөбүт улахан эдьиийим хайыһарынан дьарыктаммыта. Кинини батыһан хайыһардаабытым, онтон сыыйа улууска, республикаҕа сүүрэр буолбутум.
— Түмүккэ, маннык түгэҥҥэ, кыайыыгын кимиэхэ аныыгын диэччилэр?
— Бу кыайыыбын төрөөбүт улууспар – Аммаҕа, Амма дьонугар аныыбын.
— Николай, өссө төгүл эҕэрдэ! Үөрэххэр, спорка ситиһиилэри! Өссө да биир дойдулаахтаргын бэйэҥ ситиһиигинэн үөрдэ-көтүтэ тур.
Петр ПАВЛОВ.
Ааптар хаартыскаҕа түһэриилэрэ.
Читайте нас в:
