Спорт кыһыҥҥы көрүҥнэригэр Саха сирин спартакиадата түмүктүүр түһүмэххэ тахсан эрэр. Бүгүҥҥү күн быһаарыылаах буолуоҕа. Ол курдук, бүгүн Алдаҥҥа – сноуборд, шорт-трек, кыһыҥҥы многоборье, хайыһар, онтон Нерюнгрига – хотугу многоборье, фигурнай хаҥкылааһын, шайбалаах хоккей көрүҥнэригэр тыҥааһыннаах киирсиилэр күүтүллэллэр. Сарсын, спартакиада бүтэһик күнүгэр – хайыһарга эстафета.
Ханнык хамаандалар ордук элбэх мэтээллэннилэр диир буоллахха, кулун тутар 28 күнүнээҕи туругунан Нерюнгри хамаандата 34 мэтээллээх. Ол иһигэр 12 кыһыл көмүс, 10 үрүҥ көмүс, 12 боруонса. Онтон Алдан хамаандата 33 мэтээллээх (12+7+14). Дьокуускайдар бу күҥҥэ 28 (15+10+3) мэтээллээхтэр.
Ити курдук, Мэҥэ Хаҥалас – 17 (5+7+5), Амма – 7 (1+3+3), Чурапчы – 7 (2+2+3), Нам – 5 (2+2+1) мэтээллээхтэр.
Балаһыанньа быһыытынан спартакиада хамаанданан түмүгэ 4 бөлөххө араарыллан таһаарыллар. Онуоха маҥнайгы бөлөххө бастакы миэстэ иһин сүрдээх хатыһыылаах киирсии буола турар. Ол курдук, Алдан, Дьокуускай, Мэҥэ Хаҥалас, Нерюнгри – сүрүн миэстэ иһин күрэстэһэллэр.
Иккис бөлөххө бастакы миэстэ иһин киирсиигэ билиҥҥитэ Амма, Нам, Чурапчы, Уус Алдан хамаандаларын балаһыанньалара үчүгэй курдук.
Үһүс бөлөххө – Өймөкөөн уонна Булуҥ, төрдүскэ – Аллайыаха уонна Анаабыр бастакы миэстэ иһин киирсиэхтэрэ.
Дьэ, эппиппит курдук, ханнык хамаандалар төһө мэтээллэнэллэрин уонна түмүккэ хаһыс миэстэни ылалларын сүрүннээн бүгүҥҥү, спартакиада бэһис күнүн күрэхтэһиилэрэ быһаарыахтара.
Петр Павлов
Ааптар хаартыскаҕа түһэриитэ
Читайте нас в:
