Спорт кыһыҥҥы көрүҥнэригэр республикатааҕы V спартакиаданы бэлэмнээн уонна тэрийэн ыытыыга хас да анал хамыыһыйа тэриллэн үлэлиир. Холобур, аккредитация хамыыһыйатын Саха сирин физическэй култуураҕа уонна маассабай спорка управлениетын отделын начальнига Зинаида Егоровна Афанасьева салайар. Күрэхтэһии бастакы күнүгэр биһиги киниттэн, билиҥҥи кэмҥэ хас, төһө хамаанда уонна спортсмен кэлбитин сурастыбыт.
—Маннык, аккредитация хамыыһыйытыгар 2010 сылтан үлэлибин. Холобур, «Азия оҕолоро» норуоттар икки ардыларынааҕы спортивнай оонньууларга, Россия чемпионаттарыгар, Р.М. Дмитриев, Д.П. Коркин ааттарынан норуоттар икки ардыларынааҕы турнирдарга, Манчаары спартакиадаларыгар, Саха сирин спортивнай оонньууларыгар үлэлээбитим. Онтон 2017 сылтан республика иһигэр ыытыллар улахан таһымнаах спортивнай тэрээһиннэргэ аккредитация хамыыһыйатын салайааччытынан сылдьабын.
Быйылгы, кыһыҥҥы спартакиада аккредитацияҕа хамыыһыйыта үлэтин кулун тутар 11 күнүттэн саҕалаабыта. Хамыыһыйаҕа сэттиэбит, мин салайааччыбын. Билигин Нерюнгрига үс киһибит үлэлии сылдьар: Александр Софронов, Анна Кириллина, Полина Абрамова. Онтон бу Алдаҥҥа төрдүөбүт: Анна Новгородова, Любовь Тарасова, Андрей Ситников. Биһиги хамыыһыйабыт – саамай уһуннук үлэлиир хамыыһыйа уонна үлэтин кимнээҕэр да эрдэттэн саҕалыыр. Хас биирдии улуустары, хамаандалары кытта эрдэттэн үлэлиибит. Барыта наһаа эппиэтинэстээх.
Нерюнгрига бэҕэьээ-бүгүн 15 хамаанда аккредитацияны ааста, 261 киһи. Онтон бу Алдаҥҥа 11 хамаанда. Сорох хамаандалар айаннаан иһэллэр. Мантан киэһээ аккредитацияны ааһыахтара. Быйылгы спартакиадаҕа барыта 28 хамаанда кыттарга сайаапка биэрбитэ. Тэрийээччилэри, судьуйалары, бочуоттаах ыалдьыттары, спортсменнары, волонтердары о.д.а. киллэрэн туран барыта балтараа тыһыынча киһи кыттар диэн былааннаан олоробут. Волонтердар сүрүннээн олохтоохтор. Нерюнгрига эмиэ отут волонтер баар. Биһиги хамыыһыйабыт бүтэһик күҥҥэ диэри үлэлиир.
Спорт кыһыҥҥы көрүҥнэригэр Алдан базата оҥоһуллан, сүрдээх үчүгэй буолла. Манна аҥардас спорт күрэхтэһиилэрэ эрэ буолбакка, дьон-сэргэ өрөбүллэргэ көй салгыҥҥа дьарыктаналларыгар эмиэ туһаныллар. Бэйэм, дьон чэгиэн-чэбдик буоларын туһугар үлэлэһэр киһи быһыытынан эттэхпинэ, бу спортивнай база онуоха сүрдээх туһалаах.
Спартакиадаҕа хамаандалар эрдэттэн наһаа тэринэннэр, бэйэлэрэ дьэрэкээн көстүүлээх спортивнай форма оҥотторон, хамаандаларын састаабын талан, сүрдээҕин кыһаналларын көрөн киһи астынар. Итиннэ, хамаандалар бэйэлэригэр түмсүүлээх, эрэллээх буолуулара, эрчиллиилэрэ барыта көстөр дии саныыбын.
Саамай элбэх кыттааччылаах хамаандаларынан Нерюнгри, Дьокуускай, Алдан, Мэҥэ Хаҥалас хамаандалара буолаллар. Улуустарга спорт кыһыҥҥы спортарын көрүҥнэрэ сайдара үчүгэй дии саныыбын. Өссө сайдыахтарын наада.
Маны тэҥэ, аһылык, күрэхтэһиигэ кэлбит дьону олохтооһун уонна спартакиада ыытыллар спортивнай обьектарыгар аккредитация сертификаттара тэрийэр комитет мунньаҕар СР физическэй култуураҕа уонна спорка министрин солбуйааччы Гаврил Михайлович Мохначевскай туттарбыта.
Санатан эттэххэ, Саха сирин спорт кыһыҥҥы көрүҥнэригэр V спартакиадата кулун тутар 30 күнүгэр диэри ыытыллар. Алдан уонна Нерюнгри куораттарга спорт уон көрүҥэр кыргыттарга, уолаттарга, дьахталларга уонна эр дьоҥҥо чемпионнар уонна призердар ааттара биллиэхтэрэ. Спартакиаданы үөрүүлээхтик аһыы кулун тутар 26 күнүгэр – оптуорунньукка күнүс 14:00 чаастан саҕаланар.
Петр ПАВЛОВ.
Ааптар хаартыскаҕа түһэриитэ.
Читайте нас в:
