Бүгүҥҥүттэн Алдаҥҥа Саха сирин спорт кыһыҥҥы көрүҥнэригэр V спартакиада саҕаланар. Билигин, бастакы күн маҥнайгы аҥарыгар, сүрүннээн – бэлиэтэнии, мандат, секретариат үлэтэ.

Күрэхтэһиини тэрийээччилэр Алданнааҕы хайыһар спордун базатыгар мустан үлэлэрин саҕалаатылар. Ол курдук, база үһүс этээһин биир улахан саалатыгар мандат, аккредитация уонна медицина хамыыһыйалара үлэлииллэр.

Биһиги спартакиада медицинэҕэ сыһыаннаах специалистарын кытта кэпсэттибит.

Анна Антонова, спортивнай быраас:

«Центр медицинской реабилитации и спортивной медицины тэрилтэттэн сылдьабыт. Манна алта буолан кэллибит. Кылаабынай бырааспыт Кюнна Николаевна Назарова эмиэ баар. Биһиги үлэһиттэрбит Нерюнгригэ ыытыллар күрэхтэһиигэ эмиэ бааллар. Кылаабынай бырааһы солбуйааччы Сергей Гаврильевич Черкашин салалталаах.

Бастатан туран, мандакка кэлбит хамаандалар докуменнарын, санэпид ыспыраапкаларын төһө сөптөөхтөрүн көрөбүт, бэрэбиэркэлиибит. Салгыы кинилэри атын хамыыһыйаҕа ыытабыт. Хас биирдии күрэхтэһии быраас көрүүтүнэн ыытыллар. Медицина өттүнэн көмөнү барытын оҥоробут. Маннык улахан таһымнаах республикатааҕы күрэхтэһиилэргэ өрүү сылдьан үлэлиибит.

Спорт көрүҥнэрэ бары эчэйиилээх буолуохтарын сөп. Хоккей, хайыһарынан хайаттан түһүү, хайыһар, фигурнай хаҥкылааһын... Онон барытыгар бастакы көмөнү оҥорорго бэлэм буолуохтаахпыт. Барыта этэҥҥэ буоларыгар баҕарабыт.

Алдаҥҥа күрэхтэһиини наһаа үчүгэйдик тэрийбиттэр. Үлэлииргэ усулуобуйа барыта баар. Үлэлиир, күрэхтэһии буолар сирэ барыта кэлимсэ».

Санатан эттэххэ, Саха сирин спорт кыһыҥҥы көрүҥнэригэр V спартакиадатын үөрүүлээх аһыллыыта сарсын, кулун тутар 26 күнүгэр, ыытыллар.

Петр ПАВЛОВ

Ааптар хаартыскаҕа түһэриитэ