Аҕа дойду сэриитин ыар кэмнэригэр биһигини, бииргэ төрөөбүттэрин, ыал улахан оҕото буолан, көрөн-харайан улаатыннаран, үөрэттэрэн, киһи-хара гынан, ыал оҥортоон, дьаһайан-салайан, Уус Маайа оройуонугар Шишигина Варвара Михайловна олорор. Кини кулун тутар 14 күнүгэр 89 сааһын туолар.
Аҕабыт сэриигэ өлбүтэ, ийэбит хараҥаттан хараҥаҕа диэри, эр киһи курдук от оттоон, мас мастаан, сир тиэрэн, бурдук ыһан, ыанньыксыттаан, «Кыһыл маяк” колхоз биир кыайыылаах үлэһитэ этэ.
Варвара Михайловна оройуон маҥнайгы трактористката, колхоз, совхоз бастыҥ ыанньыксыта, коммунистическай улэ ударнига, элбэх правительственнай наҕараадалар кавалера, Уус Маайа оройуонун бочуоттаах олохтооҕо.
Кини 70 тахса сыл анараа өттүгэр атын сиргэ көһөрүллүбүт “Кыһыл маяк” колхоз дьонугар государствоттан биир биэс харчыта суох памятник туруорда. Маны барытын чинчийэн, чуолкайдаан, ааттарын, төрөөбүт сылларын бэлиэтээтэ, тимиргэ суруйан өйдөбүнньүк оҥоттордо. Бу бөһүөлэк схематын оҥорон, ханнык дьиэҕэ кимнээх олорбуттарын сурукка киллэрэн, дьон көрүүтүгэр туруортарда.
Өйдөбүнньүк бэлиэ сэриигэ барбыт буойуннарга, тыыл бэтэрээннэригэр ананар. Урут бөһүөлэк уулуссалара хаһан да манна сылдьыбатах улуу дьон ааттарынан ааттаналлара. Ону кини буолан, баар мэһэйдэри туораан, былаастартан сөбүлэҥ ылан, ийэтин ыанньыксыт Атласова Александра Дмитриевна аатынан уулуссаны ааттатан, дьону соһуппута, үөрдүбүтэ даҕаны. Ийэбит 100 сааһын туолуутугар Алдан өрүс үрдүгэр, Тэбэнкэн хайатын түөһүгэр, маҥан мрамортан памятник туруорбута онтуката ыраахтан маяк курдук кылбайан дьону ыҥыра-угуйа турар, кэрэхсэтэр, сөхтөрөр, холобур буолар.
Кини элбэх хаһыаттарга суруттарар, бэйэтэ эмиэ хаһыаттарга суруйар. Ыстатыйаларыгар, кыларыйан турар кырдыгы суруйар, ону дьон сөбүлээн ааҕар. Кини суруйууларын справочник гыныахха сөп. Тугу да эппэт, саппат, сымыйаны суруйбат. Сыратын биэрэн, ииппит-аһаппыт оҕолоро, хаан аймахтара элбээн, 161 буоллубут.
Билигин бэйэбит төһө да кырдьан, эбээ тылын истэбит, дьаһалын толоробут, эдьиийбитинэн киэн туттабыт, кини өссө даҕаны үөрэ, көтө-айа тута олоруоҕун, уһун үйэлэниэҕин баҕарабыт, оннук буолуоҕа да диэн эрэнэбит.
Атласов Иван Михайлович уонна бииргэ төрөөбүт балтыларыҥ
Читайте нас в:
