Бу күннэргэ Сиинэҕэ байыаннай дьайыыттан үс байыас уоппускаларыгар кэллилэр. Хомуурга ыҥырыллан барбыт хорсун-хоодуот уолаттар сылтан ордук инники кирбиигэ сырыттылар. Дьоннорун-сэргэлэрин ахтан, дойдуларын суохтаан кэлбит ыччаты биир дойдулаахтара истиҥник көрүстүлэр. Култуура киинигэр нэһилиэк дьаһалтата көрсүһүү тэрийдэ, онно Сиинэ олохтоохторо, байыастар аймахтара, табаарыстара, бииргэ үлэлиир кэллиэгэлэрэ кэлэн аһаҕас кэпсэтиигэ кыттыстылар, диэн иһитиннэрэр «Хаҥалас» хаһыат.

— Бу көрсүһүүгэ уолаттар туох-хайдах сылдьалларын, хайдах услуобуйаҕа олороллорун, туохха наадыйалларын кэпсээтилэр. Араас ыйытыыларга төһө кыалларынан толору хоруйдаатылар. Баһылыкпыт Айдан Леверьев ахсынньыга Украина сиригэр-уотугар командировкаҕа баран кэлбитин туһунан уонна Сиинэ нэһилиэгин дьахталларын күүстэринэн туох өйөбүл-көмө оҥоһулларын кылгас видео-ролик оҥорон дьон дьүүлүгэр көрдөрдүбүт. Бэрт сотору кэминэн бу эр хоһуун уолаттарбыт сулууспаларыгар төннүөхтэрэ, онон нэһилиэк дьахталларын аатыттан сүрэхпит сылааһын иҥэрэн бэйэбит илиибитинэн таба тириититтэн тикпит сылаас, сымнаҕас олбохторбутун, угунньуктары уонна Сиинэ орто оскуолатын үөрэнээччилэрэ учууталлара Вера Сакердонова салалтатынан тикпит харысхалларын туттардыбыт. Ону сэргэ, Юлия Якушева олорор түөлбэтин аатыттан биир түөлбэлээх уолларыгар, ыраах сиргэ арчылыы-араҥаччылыы сырыттын диэн харысхал бэлэхтээтэ, — диэн нэһилиэк биир бастыҥ общественнига, волонтер үлэтин көҕүлээччи Ульяна Степанова кылгастык кэпсээтэ.

Ыраах айаҥҥа турунар байыастар дойдуларыттан күүс-сэниэ, алгыс ылынан, санааларын-оноолорун сааһыланан этэҥҥэ эрэ сырыттыннар!

Ольга Гермогенова