Г.Д. Бястинов-Бэс Дьарааһын аатынан Чымынаайы орто оскуолатын үөрэнээччилэригэр Герой күнүн көрсө Украинаҕа буола турар байыаннай дьайыыга кытта сылдьар уонна геройдуу охтубут биир дойдулаах уолаттары сырдатыыга кылаас чаастара буолан аастылар.
Байыаннай–патриотическай иитиигэ анаммыт кылаас чаастар Варвара Чекурова аатынан олохтоох библиотекаҕа ыытылыннылар.
Кылаас чаастар хас да түһүмэҕинэн бардылар. Бастакы түһүмэххэ Украинаҕа ыытылла турар быһыыны-майгыны, Быстах Байыаннай Эпэрээссийэ туһунан дириҥ ис хоһоонноохтук история учуутала Лена Иванова кэпсээтэ. Кини оҕолорго патриотическай иитии сүрүн өйдөбүллэрин биэрдэ. Төрөөбүт дойдуга тапталы иҥэриини, Арассыыйа модун государство буоларын, кининэн киэн туттууну, көмө, өйөбүл оҥоруу диэн улуу дьыала буоларын өссө төгүл быһаарда, туһааннаах холобурдары аҕалла.
Оскуола социальнай педагога Парасковья Богдокумова, модельнай библиотека салайааччыта Евдокия Белолюбская төрөөбүт түөлбэбититтэн быстах дьайыыларга сулууспалыы сылдьан геройдуу охтубут биир дойдулаахтарбыт П.П. Иванов, В.Э. Тарабукин уонна билигин сулууспалыы сылдьар байыастар тустарынан истиҥник кэпсээтилэр уонна кинилэр олохторун, сулууспаларын туһунан видеосюжеттары көрдөрдүлэр.
Нэһилиэк кыраайы үөрэтэр түмэлин үлэһитэ, ветераннар түмсүүтүн салайааччыта Григорьева А.Т. олохтоох нэһилиэнньэ көмөтүн сиһилии кэпсээтэ. Төрөөбүт дойдуларыттан ыраах сулууспалыы сылдьар биир дойдулаахтарыгар уонна кинилэр дьиэ кэргэттэригэр Уус Амма нэһилиэгин дьоно-сэргэтэ харчынан, аһынан-таҥаһынан, маскировочнай сетканан көмөлөрүн оҕолор билэллэр. Кинилэр төрөппүттэрэ биэрэр көмөлөрүгэр эбии бу сырыыга бэйэлэрин илиилэринэн, сүрэхтэрин сылааһынан оҥоһуллар өйөбүллэрин биэрээри муһуннулар.
«Окуопа чүмэчитэ” акция
Окуопа чүмэчитэ байыаннай дьайыыга сылдьар дьоҥҥо саамай наадалаах уонна кылаабынай тэрил буолар. Аны оҥоһуга боростуойа уонна туһалааҕа биллэр.
Оскуола оҕолоро ис сүрэхтэриттэн ылсан, дьиэлэриттэн кэнсиэрбэ бааҥкатын, хортуону уонна чүмэчини аҕалан, бу туһалаах чүмэчини оҥордулар.
Алын кылаас оҕолоро окуопа чүмэчитин таһыгар байыастарга суруктары суруйдулар, байыаннай тиэмэҕэ уруһуйдаатылар. Суруллубуттартан аахтахха, үгүстэрэ “Россия победит!” диэн суруйбуттар, ону ааҕан киһи үөрэр, ол аата “Россия кыайыа!” — диэн эрэнэллэрин биллэрдэхтэрэ. Үгүстэрэ Россия былааҕын уруһуйдаан “Россия модун күүс, модун дойду” буоларын көрдөрөллөр.
“Окуопа чүмэчитэ” акция туһунан оскуола 6 кылааһын үөрэнээччитэ Илиан Мочегусов маннык кэпсээтэ:
“Кылааспыт салайааччыта Элеонора Николаевна “Окуопа чүмэчитэ” акция буоларыгар кэнсиэрбэ бааҥката, чүмэчи, хортуон аҕаларбытын эппитэ. Акция күн кылааһынан оҥорбуппут. Хортуоннары быһан кэнсиэрбэ бааҥкатын иһигэр укпуппут уонна тас өртүгэр сулууспалыы сылдьар байыастарга диэммит уруһуй оҥорбуппут. Мин окуопаҕа туттуллар чүмэчи таһыгар үс өҥнөөх Россия былааҕын уруһуйдаабытым. Тоҕо диэтэххэ, Россия саамай күүстээх уонна улахан государство. Онтон дьиэбэр илдьэммин аҕабыныын чүмэчи уулларан хордуоннаах бааҥкаҕа куппуппут. Оҥорбут чүмэчим байыстарга сырдыгы биэрдин, үчүгэйи эрэ оҥордун. Бу акцияҕа оскуола оҕото барыта кыттынна”.
Оскуола бары үөрэнээччитэ “Окуопа чүмэчитэ” акцияҕа кыттан оҥорбуттарын, улахан сүһүөх оҕолоро оҥоһуктары ыытары бэлэмнээтилэр.
Бу үлэлэри кытта олохтоох ийэлэр, эбэлэр кыттыыларынан оҥоһуллубут маскировочнай сетка, сылаас сэлиэччик, куллуку тигиилэрин, нэһилиэнньэттэн хомуллубут уочараттаах көмө ас-үөл, таҥас-сап Украина сиригэр сулууспалыы сылдьар биир дойдулаахтарбытыгар барыаҕа.
Үтүө санаанан оҥоһуллубут үтүө дьыала кыайыыны аҕаллын, төрөөбүт төрүт дойду сыта-сымара, аһа-үөлэ күүстэригэр күүс эптин. Оттон үөрэнээчччилэр патриотическай иитиилэрэ кинилэри төрөөбүт дойдуга тапталы биэрэргэ, дьоҥҥо-сэргэҕэ көмөнү оҥорорго олук буоллун.
Лариса Аввакумова, РФ Суруналыыстарын сойууһун чилиэнэ
Читайте нас в:
