Сэтинньи 15-17 күннэригэр Санкт-Петербург куоракка «Кочующий музей» регионнар икки ардыларынааҕы бырайыак кыттыылаахтара муһуннулар. Форум Государственнай Эрмитаж театрыгар Россия түмэллэрин сойууһун уопсай мунньаҕыттан саҕаланна. Ол кэннэ Государственнай академическай капелла улахан саалатыгар үс күн устата «Музейные маршруты России» бырайыак, музыка түмэллэрин икки ардыларыгар көрсүһүүлэр ыытылыннылар.
Бу форумҥа Саха сирин олохтоох омуктарын музыкатын уонна фольклорун түмэлин директора Мария Корнилова уонна М.Н. Жирков аатынан Дьокуускайдааҕы музыка колледжын фольклор салаатын уһуйааччыта, СР үтүөлээх артыыһа, аан дойду виртуоз хомусчута Варвара Степанова-Арчыына кыттыыны ыллылар.
Варвара Степанова-Арчыына музыка инструменнарын уонна олохтоох омуктар тустарынан выставканы илдьэ баран көрдөрбүтүн туһунан маннык кэпсээтэ:
“Ломоносов куоракка дьиэ кэргэнинэн ааҕыы библиотекатыгар Амантай Григорьев оҥорбут саха омук музыканы таһаарар инструменнарын туһунан выставка туруордубут. Ону таһынан хомуска оонньуурга дьарыктары ыыттыбыт уонна аҕыйах ахсааннаах олохтоох омуктар тустарынан тэттик ойуулуктары көрдөрдүбүт”.
“Оттон Петергоф куоракка С.С. Гейченко аатынан оройуоннааҕы киин библиотекаҕа выставканы, хомус дьарыгын уонна ойуулугу таһынан, В.В. Путин национальнай фондатын бырайыагын өйөбүлүнэн уһуллубут «Кочующий музей» документальнай киинэни сүрэхтээтибит. Киинэ режиссера Мила Кудряшова. Ломоносов уонна Петергоф олохтоохторо Саха сиригэр олорор олохтоох омуктар тустарынан үгүһү билэн-көрөн, үөрэн-көтөн тарҕастылар”, — сиһилии Арчыына сэһэргээтэ.
«Кочующий музей» регионнар икки ардыларынааҕы бырайыак Санкт-Петербург куорат Шереметьевскай дыбарыаһыгар, музыка түмэлигэр, А.И. Герцен аатынан Хотугу омуктар институттарыгар, Кронштадт историятын түмэлигэр, Смольнай выставка саалатыгар уонна Ленфильмҥа айанын салҕаата.
Хаартыскалары Варвара Степанова — Арчыына биэрдэ
Читайте нас в:
