Бу күннэргэ кырдьаҕас Баайаҕа нэһилиэгин Ытык Саарынын, улуус, нэһилиэк бочуоттаах олохтооҕун, 20-с үйэ чулуу булчутун, марафонец-спортсмены, тыыл уонна үлэ бэтэрээнин, амарах аҕаны, эйэҕэс эһэни Дмитрий Ефремович Дедюкины төрөөбүтэ 95 сааһынан биир дойдулаахтара эҕэрдэлээтилэр, үтүө-мааны тылларын анаатылар.

Былыр былыргыттан «олох олоруу хонууну туорааһын буолбатах» диэн бэргэн этии баар. Дмитрий Ефремович олорбут кэмэ икки үйэни хабар, икки үйэ ураты кэрдиис сылларыгар олордо, үлэлээтэ, эдэр бэйэтэ аҕамсыйда. Дойдубут историятын тыыннаах туоһутунан буолла. Кини хараҕын далыгар «Кутаама» холкуос тэриллиитэ, бөдөҥсүйүүтэ, кэлин уһугар төрөөбүт үрэҕэ иччитэхсийиитэ, биир дойдулаахтара, бииргэ төрөөбүт убайдара Аҕа дойду сэриитигэр аттаныылара, үгүстэр ол дойду буоругар кыргыһыыга охтоннор, «хара сурук» кэлиитин ыар тыына, тыа баһаардара, сут-сутурҕан сабардааһына, хоргуйан өлүү, от сии көһүү, Кыайыы буолан, өрө тыыныы, сырҕан бааһы оһорунуу сыллара, үлэ уонна үлэ – барыта ааспыта. Итини барытын Миитэрэй тулуйан, олох биэтэгэр кыайыылаах тахсыбыта.

Дмитрий Ефремович Баайаҕатын патриота, харыс сири халбарыйбакка 95 сыл устата дойдутугар сүөһү биригэдьииринэн, сылгыһытынан, түүлээхситинэн, дружбиһынан үлэлээбитэ. Чэгиэн туругу, чөл олоҕу, таһаарыылаах үлэни, успуорка ситиһиини бэйэтин дьулуурунан уонна тулуурунан ситистэ уонна ону кэнчээри ыччакка кэпсиир, тарҕатар үтүө үгэһин тутуһан кэллэ.

Миитэрэй: «Ыччат, оҕолорбут барахсаттар, куһаҕан дьаллыкка сыстыбакка, успуордунан ситимнээхтик, бэйэ кыаҕын көрөн, күннээҕи түбүгү сөпкө аттаран дьарыктаныахтарын баҕарабын. Ону тэҥэ үлэни өрө тутан олоруохтарын наада. Үлэһит, бэйэтин кыанар киһи олоҕун таһыма үрдүк, өйө-санаата туруктаах, инникилээх буолар. Хамсаныы уонна өй киһини баһылыахтаах», — диэн ыччакка этэр.

Дмитрий Ефремович кырыйдым диэбэт, үтүө дьыаланан дьарыктанар. «Мандар Уус» саха олоҕун көрдөрөр түмэл мецената, сүбэһитэ.

Кинини 95 сааһынан нэһилиэк баһылыгын э.т. Анна Николаева эҕэрдэлээтэ, «барыбытыгар холобур буола, чэгиэн сырыт, сүүс сааскын сүүрэ сылдьан көрүс» диэн алҕаан туран, телевизор туттарда.

Сонор суолун чулуу булчутугар Дмитрий Ефремович Дедюкиҥҥа анаан, «Эр Хоһуун» түмсүү уолаттара «Байанай ыырынан» күрэхтэһиини 4 хамаанданан тэрийэн ыыттылар. Манна булчут сатабыла, кыраҕыта, сымсата, кыаҕа, билиитэ барыта аттарыллан киирэн, сэргэх күрэх ыытылынна. Дмитрий Ефремович күрэхтэһииттэн астынна уонна бэйэтин тус бирииһин Аркадий Хатылаевка туттарда. Сиэн балта Мира Николаевна Луковцева дьиэ кэргэнин бирииһин элбэх оҕолоох аҕа Игнатий Слепцов тутан үөрдэ.

Дмитрий Ефремович аны биэс сылынан 100 сааспар көрсүөхпүт диэн бар дьонун үөртэ. Дьоллоох, доруобай буол, ытык киһибит!

Маргарита Егорова, общ.корр.