Кэбээйи улууһун Сииттэ нэһилиэгэр ийэлэр, эбэлэр быстах операцияҕа сылдьар буойуттарга үтүлүк, кээнчэ, моонньох онтон да атын сылаас таҥастары тигэн көмө онорорго, аһымал акция тэрийэн, үлэлэрин саҕалаатылар. Бу туһунан «Дабаан» хаһыат иһитиннэрэр. 

Бу тэрээһини олохтоох култуура киинин үлэһиттэрэ, ийэ декадатыгар сөп түбэһиннэрэн тэрийдилэр. Нэһилиэк ийэлэрэ илиилэрин сылааһын иҥэрэн, алгыс тылларын анаан, бары дууһаларын ууран туран тикпиттэрэ уолаттары  хайаан да арчылыа, араҥаччылыа диэн эрэнэн туран көхтөөх кыттыыны ыллылар.

Быстах дьайыы саҕаланыаҕыттан Сииттэ нэһилиэгэ элбэх, улахан көмөнү оҥордо. Онон нэһилиэкпит дьонугар махталбыт муҥура суох. «Илииҥ сылааһын бэлэхтээ», «Барыта Кыайыы иһин!» бэргэн этиилэр билиҥҥи олохпут сүрүн ирдэбилэ буоларын бары бэркэ өйдүүбүт уонна хайаан да Кыайыы өрөгөйдүө диэн эрэнэбит. Бу акцияҕа бастакынан көмөҕө кэлбит эдэркээн ийэлэрбитигэр Анастасия Сидороваҕа, Туяра Поповаҕа, Екатерина Расуловаҕа, Анастасия Парниковаҕа, Ольга Петроваҕа, Марианна Захароваҕа, Настя Ногородоваҕа, Яна Оконешниковаҕа, Лена Васильеваҕа улахан махталбытын тиэрдэбит. «Алаһа» эбэлэр кулууптарын көхтөөх эбэлэрэ Мотрена Васильева, Татьяна Герасимова, Наташа Гуляева сүбэлэрэ-амалара, көмөлөрө баһаам.

Ити курдук сииттэлэр күн киһитэ көмүскэс, айыы киһитэ аһыныгас диэн өбүгэлэрбит эппит ох тылларын ханнык да түгэҥҥэ умнубаттар.

Марианна Сивцева