Сочига ыытылла турар доруобуйаларынан хааччахтаах дьон успуорка Арассыыйатааҕы бэстибээлигэр Саха сирин хамаандата кыттар. Өрөспүүбүлүкэтээҕи инбэлииттэр уопсастыбатын бэрэссэдээтэлэ Ирина Лебедева салайааччылаах хамаандаҕа күрэхтэһии маҥнайгы күнэ бастакы кыһыл көмүс мэтээли аҕалла.
Ирина Лебедева иһитиннэрбитинэн, остуол тенниһигэр Александра Слепцова чөмпүйүөн үрдүк аатын сүктэ. Бэстибээл бу иннинээҕи сылларыгар кини икки төгүл кыайыылаах буолбута.
Олорон эрэн остуол тенниһигэр Валентин Борисов чаҕылхайдык оонньоон, полуфиналга киирдэ. Бүгүн кини мэтээл иһин киирсиэ. Кини былырыыҥҥы бэстибээл чөмпүйүөнэ. Дартс күрэҕэр Евгений Птицын 503 очкону ылан, былырыыҥҥы көрдөрүүтүн лаппа тупсарда. Түргэн саахымакка Егор Федоров үс оонньууттан иккитин кыайан, бүгүн түөрт киирсиини ааһыаҕа. Бу бэстибээлгэ бастакытын кыттар Кирилл Неустроев 50 миэтэрэҕэ харбааһыҥҥа үс иһигэр киирбэтэ эрээри, көрдөрүүтэ куһаҕана суох.
Бүгүҥҥү күҥҥэ Сахабыт сирин хамаандатыгар саҥа кыайыылары баҕарабыт!
Читайте нас в:
