Бу күннэргэ өрөспүүбүлүкэ үрдүнэн «Лоокуут уонна Ньургуһун» киинэ көстө турар. Орто Халымаҕа, «Кулума» култуура киинин киинэ көрдөрөр саалатыгар премьерэ көстүбүтэ үһүс күнэ. Бүгүҥҥү көстүүнү Байды нэһилиэгин бэтэрээннэрэ кэлэн көрдүлэр. Ытык дьону бэтэрээннэр Сэбиэтин бэрэссэдээтэлэ Виктория Васильевна арыаллаан илдьэ сырытта, диэн сырдатар «Халыма долгуннара» хаһыат.
«Олохтоох дьаһалтабыт баһылыга Аркадий Дмитриевич Бубякин көҕүлээһининэн, Юрий Константинович Третьяков көмөтүнэн, Налимскайтан икки массыынанан 12 буолан буор босхо айаннаан кэллибит. Киинэҕэ ытык дьоммутун, аҕам саастаах дьон уонна оҕо уһуйаанын үлэһиттэрин күнүн чэрчитинэн сырытыннардыбыт. Оҕо уһуйаанын бэтэрээннэрэ, Марина Николаевна Винокурова билиэттэрин төлөөн, босхо көрдүлэр. Киинэни олус сэргээтибит. Биһиги да хоту дойдубутугар киинэни бэркэ устар, оҥорор буолбуттар. Урут оҕо, эдэр сылдьан бу номох буолбут үһүйээни тыйаатырга көрөр буоларбыт.
Билигин аныгылыы оҥоһуулаах, үрдүк хаачыстыбалаах киинэ быһыытынан көрөн бэркэ сэргээтибит. Киинэҕэ култуурабыт баайа, айылҕабыт кэрэтэ, үрүҥ-хара ойууннар олоххо дьайыылара, таптал күүһэ туохха да тэҥнэммэт аптаах абылаҥа уо.д.а. хартыыналар толору итэҕэтиилээхтик ойууланаллар. Сүрүн артыыстар оруолларын ис сүрэхтэн олус үчүгэйдик толорбуттар.
«Кулума» култуурабыт киинэ өрөспүүбүлүкэҕэ буруолуу сылдьар саҥа киинэлэри тутатына көрдөрөрө олус үчүгэй. Холобур, сорохпут, киносаалаҕа аан маҥнайгыбытын кэлэн, олус астынан, дуоһуйан, сэргэхсийэн сырыттыбыт», — диэн үөрүүтүн үллэһиннэ Виктория Васильевна.
Сэһэргэстэ Саргылана Кокорина
Өссө ааҕыҥ:
Киинэ тыйаатыра Булгунньахтаах олохтоохторун сэргэхситэр
Читайте нас в:
