Байыаннай дьайыыга кытта сылдьар биир дойдулаахтарыгар, эдэркээн ыччаттарыгар көмө-тирэх буолаары Кирбэй нэһилиэгин уопсастыбаннаһа акцияларга кытта сылдьар. Үтүө хамсааһынтан Харыйалаах орто оскуолатын үөрэнээччилэрэ эмиэ туора турбаттар. Бу туһунан «Сардаҥа» хаһыат иһитиннэрэр.
Бу сыл иккис кыбаарталыгар сылаас таҥас, буорту буолбат аһылык, эмп-томп хомуллубут. Уопсай хомуллубуту барытын харчытынан аахтахха, 68 044 (алта уон аҕыс тыһыынча түөрт уон түөрт) солкуобайга тэҥнэһэр. Ийэлэр, булчуттар көмөлөрүнэн хаппыт эт бэлэмнэммит.
Хомуллубут көмөнү барытын оройуоннааҕы анал салайар ыстаапка туттарыллыбыт. Харчынан көмөтө “Сигундер” көмө пуондатын счетугар киирбит.
Көмө акцияларга Харыйалаах орто оскуолатын үөрэнээччилэрэ тус кылааттарын киллэрэллэр. Бастакы, иккис, бэһис кылаастар салайааччылара Ариадна Алексеевна, Сардана Петровна, Лена Степановна үөрэнээччилэрин кытта сибэкки рассаадата атыылаабыт 10 000 (уон тыһыынча) солкуобай харчыларын анал счекка киллэрбиттэр.
Дойдуларын туһугар туруулаһа, аччыктыыры, сылайары аахсыбакка, өстөөх буулдьатын аннынан сылдьар уолаттарбыт, биир дойдулаахтарын илиилэринэн бэлэмнэммит сылаас таҥастары, төрөөбүт төрүт астарын тутан төһөлөөх үөрэллэрэ буолуой.
“Дойдум сылаас тыына” акция салҕанан барар, бары көхтөөхтүк кыттан уолаттарбытыгар кыайыылаах кэлэллэригэр күүстэ-уохта эбиэххэ.
Надежда Колодезникова
Также читайте:
Коллектив Жиганской районной больницы выловил 120 кг омуля для бойцов СВО
Читайте нас в:
