Саха Өрөспүүбүлүкэтигэр Үлэ династияларын нэдиэлэтэ ыытылла турар. Ньурба улууһугар СӨ үлэ династияларын Бочуотун кинигэтигэр киирбит медик Третьяковтар-Егоровтар дьиэ кэргэни киэн тутта ааттыыллар. Бу туһунан «Ньурба” хаһыат сырдатар.
“Хас эмэ уонунан сыллар тухары биир идэҕэ бэриниилээх дьиэ кэргэттэр бааллара олус үөрүүлээх. Төрөппүттэр оҕолорун бэйэлэрин идэлэригэр сыһыаран такайаллара, оҕолоро төрөппүттэрин суолларын батыһан, эмиэ иллээх-эйэлээх кэлэктиип сорҕото буолаллара олус үчүгэй. Дьиэ кэргэн династиялара – ханнык баҕарар үлэ кэлэктиибин киэн туттуута.
Ол иһигэр СӨ үлэ династияларын Бочуотун кинигэтигэр киирбит медик Третьяковтар-Егоровтар үлэ династияларын киэн тутта ааттыыбын. Кинилэр бары бэрэстэбиитэллэрин уопсай ыстааһа — 403 сыл, ол иһигэр Ньурба улууһун доруобуйа харыстабылын эйгэтигэр 257 сыл үлэлээбиттэр.
Третьяковтар-Егоровтар династияларын төрүттээччитэ Орто Халыма Арҕахтаах нэһилиэгиттэн төрүттээх тыыл уонна үлэ бэтэрээнэ Третьякова Акулина Васильевна буолар. Кини 1944 с. кылгас медицинскэй сиэстэрэлэри үөрэтэр кууруска үөрэнэн бүтэрэн, Ньурбаҕа кэлэн кийиит буолан иккис төрөөбүт дойду оҥостубута, уһун сылларга «Малышок» дьааһылаҕа үлэлээбитэ. Кини оҕолоро, сиэннэрэ, аймахтара эмиэ медик идэтигэр муҥура суох бэриниилээх буолуу холобурун көрдөрөн ситиһиилээхтик үлэлээбиттэрэ, сорохторо билигин даҕаны үлэлии сылдьаллар.
Улууска баар үлэ династияларыгар истиҥ махталбын тиэрдэбин, чэгиэн доруобуйаны, дьолу-соргуну, үгүс үөрүүнү-көтүүнү уонна табыллыыны баҕарабын!» — диэн улуус баһылыга Алексей Иннокентьев үлэ династияларын эҕэрдэлээтэ.
Читайте нас в:
