Бу күннэргэ өрөспүүбүлүкэ үрдүнэн “Илии сылааһа-2023” күрэх буолан ааста. Өлөөн улууһун Кирбэй нэһилиэгиттэн ийэлэр, эбээлэр “Северянка” диэн хамаанда тэринэн, 7 байыас кэтэр кэмпилиэгин тиктилэр. Бу туһунан «Сардаҥа» хаһыакка хамаанда салайааччыта Надежда Колодезникова сиһилии кэпсээтэ:
Куонкурус тэрийээччилэрэ, бырабыыталыстыба салалтатын бэрэстэбиитэллэрэ көрөн олордохторуна, быһа эпииргэ холбонон — сарсыарда 9 чааска бары күрэххэ кыттар улуустары холбоон — иис сыаҕыттан кэлбит дьааһыктары арыйыы буолбута, бэйэтэ умнуллубат түгэнинэн хаалыаҕа.
Ол эбэтэр, биир киһи кэтэр кэмпилиэк таҥаһа, онно рюкзак, кыра суумка оҕото киирэр.
Көстүүмнэр сиэптэрин оҥоһуута уустук, ис-тас өттүгэр тигиллэр элеменнэрэ да элбэх. Барытын кичэйэн, көнө сиигинэн тигиллэр, байыаннай таҥас ирдэбилэ оннук эбит, күннээҕи кэтиллэр таҥастан атын. Хас көстүүм аайы тус-туһунан сиэптээх, онто барыта атын-атын оҥоһуулаах буолан бириэмэни эрэйэр. Ол да буоллар, бары биир сүбэнэн 4 күн иһигэр үлэлээн, этиллибит болдьоҕор бүтэрэн, барытын рюкзактарыгар уган пломбалаан, Дьокуускайга иис сыаҕар ыыттыбыт.
Бары кыттааччылар бүттүбүт диэн балаҕан ыйын 18 күнүгэр, киэһэ 6 чааска эмиэ быһа холбонон, аны дьааһыкпытыгар мөһөөччүктэргэ угуллубут бэлэм таҥастарбытын уга турарбытын көрдөрөн, куонкурус үлэтэ бүппүтүн туоһулуур пломбалааһын буолла.
Түөрт күннээх тыҥааһыннаах иис үлэтигэр Екатерина Григорьевна, Ирина Спиридоновна, Акулина Петровна, Раиса Иннокентьевна, Аксинья, Симона Семеновналар наһаа эппиэтинэстээхтик, сүрэхтэрин баҕатынан, илиилэрин сылааһын анаан бастакы “Илии сылааһа-2023” куонкуруска кыттыахха диэн сөбүлэһэн кыттыбыттарыгар наһаа астынным, долгуйдум, махталым муҥура суох.
Киһи үөрэрэ диэн эдьиийдии балыс Аксинья уонна Симона иистэнэр сатабылларын, үөрүйэхтэрин, аныгы иистэнэр, бүүрэр омук массыыналарын баһылаабыттарын сөхтүбүт, кэскиллээх иистэнньэҥнэр тахсыахтара диэн эрэнэбит. Кинилэр ийэлэрэ Маргарита Прокопьевна тугу сатыырынан сүбэлээн, үөрэтэн-такайан биэрбитэ манна көһүннэ.
Ууна сылдьар чараас таҥастары кыайа тутан тигэллэр, хаачыстыбатын астынныбыт. Симона кыра оҕолордоохпун диэбэккэ тэбис-тэҥҥэ киэһэлэри үлэлээн бэйэтин ылыммыт сыалын толордо. Кыттааччылар бары дьиэлэриттэн бэйэлэрин тигэр массыыналарын аҕалан үлэлээтилэр.
Нэһилиэкпит ийэлэрэ, эбээлэрэ хаһан да туора турбаттарыттан сүргэбит көтөҕүллэр, хаһан баҕарар итии аһылыктаах, үтүө сүбэлээх, хайа төһөлөөтүгүт диэбитинэн тиийэн кэлэ туралларыттан дууһабыт үөрэр, санаабыт сырдыыр, эрэлбит күүһүрэр.
Өссө ааҕыҥ:
«Илии сылааһа» иис сыаҕын байыастарга көмөтө уҕараабат
Читайте нас в:
