Хаартыскаҕа: ытык саастаах педагог Матрена Гоголева төрөппүт кыргыттарын кытта

Үүммүт 2023 сыл Арассыыйаҕа Педагог уонна Настаабынньык сылынан биллэриллибитин тэҥинэн, Уус Алдан улууһугар тохсунньу 15 күнүгэр Слепцовтар педагогическай династияларын бас-көс киһитэ, РСФСР үөрэҕириитин туйгуна, Уус Алдан улууһун бочуоттаах олохтооҕо Матрена Гоголева үөрүүлээх 101 сааһын бэлиэтээбитэ, диэн «Мүрү саһар5ата» суруйар.

Матрена Семеновна тапталлаах кэргэнинээн Алексей Николаевич Слепцовтуун, кини аҕата Николай Николаевичтан саҕа­лаан 157 сыллаах педагогическай династиялаах ытыктанар ыал. Кинилэр дьиэ кэргэттэригэр Саха Өрөспүүбүлүкэтин «Педагогтар династиялара» диэн үрдүк ааты 2002 сыл­лаахха иҥэрбиттэрэ.

Ол курдук, төрөппүт оҕолоро – улууспут бастыҥ учууталлара Мүрү 1№-дээх орто оскуолатыгар химия учууталынан үлэлээбит СӨ үөрэҕириитин туйгуна, Сорос бириэмийэтин лауреата Семен Слепцов, Мүрү 2№-дээх орто оскуолатын 39 сыл педыстаастаах алын сүһүөх кылаа­һын учуутала, РФ үөрэҕириитин бочуоттаах үлэһитэ Людмила Карамзина. Ону тэҥэ, сиэннэр Лена уонна Марина Слепцовалар Санкт Петербурга Герцен ааты­нан педагогическай институту бүтэрбит нуучча, омук тылын учууталлара, психолог идэлээхтэр.

Светлана Сивцева