Эйэлээх да кэмҥэ дойдуларын туһугар араас байыаннай дьайыыларга биһиги уолаттарбыт кыттыыны ылбыттара, хорсуннук сэриилэспиттэрэ. Ол курдук Афганистан, Чечня, Сирия көҥүллэрин иһин дойдуларын иннигэр ытык иэстэрин толорбуттара. Аны билигин Украинаҕа буола турар байыаннай дьайыыга эмиэ кытта сылдьаллар. Онно саха буойуттара, Уус Алдан уолаттара, мэлдьи инники күөҥҥэ сылдьыбыттара, сылдьаллар даҕаны. Кинилэртэн биирдэстэрэ Алексей Неустроев хорсун быһыытын иһин Россия Дьоруойа буолла. Бу туһунан «Мүрү саһарҕата» суруйар.
Бүгүн, балаҕан ыйын 6 күнүгэр, Бороҕоҥҥо араас кэмнэргэ байыаннай дьайыыларга кыттыбыт, онно сылдьан сырдык тыыннара быстыбыт буойуннарга аналлаах сквер арыллыытын бэлиэ тэрээһинэ буолла. Бу ытык, бэлиэ миэстэ оҥоһуллан олоххо киирэрин туһугар байыаннай дьайыылар кыттыылаахтарын Сэбиэтэ уонна «Мүрү нэһилиэгэ» тыа сирин түөлбэтин дьаһалтата сүбэлэрин холбообуттар.
Сквер ортотугар Украинаҕа байыаннай дьайыыга сылдьан сырдык тыына быстыбыт бойобуой хамандыыр Василий Данилов пааматынньыга турда. Бу мустубут дьон барыларын кэрэхсэбилин ылбыт өйдөбүнньүгү скульптордар Петр Эляков, Владислав Бурцев, Владимир Левин оҥорон таһаарбыттар. Ону чугас дьоно, аймахтара олус табыллыбыт диэн сыаналаатылар.
Бүгүн сквер бастакы уочарата аһылынна. «Эһиил иккис уочарата ситэрилиннэҕинэ, пааматынньык икки өттүнэн туруоруллубут стелаларга Афганистан, Чечня, Сирия сэриилэригэр уонна Украинаҕа анал байыаннай дьайыыга кыттыбыттар ааттара киириэ», – диэн Мүрү дьаһалтатын баһылыгын солбуйааччы Прокопий Румянцев эттэ.
Тэрээһиҥҥэ байыаннай дьайыыга олохторун толук уурбут Василий Данилов кэргэнэ Нария Данилова, сквери оҥорор туһунан этиини байыаннай дьайыыга барыан эрэ иннинэ киллэрбит Гаврил Попов кэргэнэ Айна Попова кыттыыны ыллылар.
Албан ааттаах, хоодуот уолаттарбыт ааттара үйэлэргэ умнуллубат, кэриэстэнэр анала оҥоһулунна.
Афанасий Сектяев
Читайте нас в:
