Бүгүн Ил Дархан Айсен Николаев Бэрдьигэстээххэ саха норуодунай поэта Сэмэн Данилов аатынан саҥа оскуола үөрүүлээх арыллыытыгар сырытта. Үс этээстээх, киэҥ-куоҥ, сырдык, аныгы технологиянан хааччыллыбыт оскуоланы «СоюзИнвест» ХЭТ кылгас кэм иһигэр тутан олохтоохторго бэлэхтээтэ. Бу туһунан «Үлэ күүһэ» хаһыат суруйар.
Айсен Николаев бастакынан Сэмэн Данилов өйдөбүнньүгэр сибэкки дьөрбөтүн ууран, ытыктыырын, сүгүрүйэрин биллэрдэ.
Үтүө үгэс быһыытынан аалай кыһыл лиэнтэни Ил Дарханы кытары улуус баһылыга Никита Андреев, оскуола дириэктэрэ Маргарита Константинова кырыйан, саҥа оскуолаҕа үөрэх дьыла арыллыбытын бигэргэттилэр.
Үөрүүлээх тэрээһиҥҥэ оскуола боруогун саҥа атыллаан киирбит, инники кэскиллэрбит бастакы кылаас үөрэнээччилэрэ доргуччу хоһоон ааҕан ыалдьыттары көрүстүлэр.
Айсен Николаев тыа сиригэр маннык улахан тутуу баран үөрэх хаачыстыбата үрдүүрүгэр улахан суолта уурулларын бэлиэтээтэ. Оҕолор туйгун сыаналарынан, билиилэринэн, ситиһиилэринэн өрөспүүбүлүкэбит сайдыытыгар кылааттарын киллэрэллэригэр эрэнэрин эттэ. Тыа сиригэр социальнай суолталаах улахан туутуу ыытыллан, 760 оҕо үөрэнэр усулуобуйата тэриллибитэ, диҥ чахчы сүдү суолталааҕын маннык оскуола Саха сиригэр бастакынан буоларын бэлиэтээтэ. Россия Президенэ Владимир Путин биһиги өрөспүүбүлүкэбит ыытар политиката сөптөөҕүн көрөн, күүскэ өйүүрүн биллэрбитин туһунан эттэ.
Айсен Николаев саҥа оскуола үлэтэ тахсыылаах буоларыгар, оҕолор араас куоҥкурустарга, күрэхтэһиилэргэ кытта баралларыгар-кэлэллэригэр уустуктары көрсүбэттэрин туһуттан автобус бэлэх уунна. Ону таһынан, үчүгэй өйдөбүл буоллун диэн, Евгений Кривошапкин Эверест Чыпчаалыгар таһаарбыт Сахабыт сирин былааҕын дохсун ытыс тыаһын ортотугар туттарда.
Өрөспүүбүлүкэ, улуус социальнай-экономичексай сайдыытыгар, саҥа сокуола тутуллуутугар кылааттарын киллэрсибит дьоҥҥо өрөспүүбүлүкэ, улуус наҕараадалара туттарылыннылар.
Үөрүүлээх тэрээһиҥҥэ ытык кырдьаҕас учууталлар Бочуоттаах ыалдьыт быһыытынан кэлэннэр, үүнэр көлүөнэ оҕолорго бэйэлэрин Алгыс тылларын анаатылар. Саҥа оскуоланы сөҕө, махтайа көрдүлэр. 1983 сыллааҕы выпускниктар аатыттан «Бүлүү» ФС салайааччыта Николай Андреев үөрэппит учууталларын көрөн үөрбүтүн, астыммытын эттэ.
Маргарита Константиноваҕа ситиһиилэри баҕаран туран 300 тыһ. солк. сертификаты бэлэх уунна. Оҕолорго ситиһиилэри баҕарда. Ил Түмэн депутата Феодосия Габышева эҕэрдэтин тириэрдэн туран, оскуола кэлэктиибигэр, оҕолорго истиҥ баҕа санаатын эттэ.
Саҥа оскуола учууталлара, үөрэнээччилэрэ Айсен Николаевка кабинеттарын көрдөрдүлэр, үлэлэрин билиһиннэрдилэр. Оҕолор Ил Дархан кэлэн ыалдьыттаабытыттан илии тутуһан, истиҥник кэпсэтэн олуһун диэн астыннылар. Бириэмэтэ төһө да ыгым буоллар хас биирдиилэрин кытары хаартыскаҕа түһэн, олохторугар умнуллубат бэлиэ түгэни бэлэхтээтэ.
Вячеслав Алексеев
Также читайте:
В Горном районе открыли самую большую сельскую школу в Якутии
Читайте нас в:
