Саха Өрөспүүбүлүкэтин Бастакы Бэрэсидьиэнэ Михаил Ефимович Николаев ыччат үөрэхтээх, өй-санаа өттүнэн сайдыылаах буолуутугар сүҥкэн кылаатын киллэрбитэ. Бу туһунан Горнай улууһун баһылыга Никита Андреев санаатын үллэстэр.
— Михаил Ефимович Николаев мин тус олохпор улахан сабыдыаллаах киһи буолар. Кини бэрэсидьиэнниирин кэмигэр саха норуота, биһиги, үөрэхтээх дьон буолуохтаахпыт диэн улахан үлэни ыыппыта, ол иһигэр оскуолаҕа үөрэнэ сылдьар ыччаты омук сиригэр үөрэттэрэргэ анал бырагыраама үлэлээбитэ. Ити чэрчитинэн үгүс кэнчээри ыччат омук дойдуларыгар баран үөрэммиттэрэ, олор истэригэр мин эмиэ хабыллан, 2,5 аҥар сыл кэриҥэ үөрэнэн турардаахпын. Ол кэмҥэ дойдубут кэккэ хайысхаларга омук дойдуларыттан арыый хаалан иһэрэ. Михаил Ефимович өрүү этэр этэ: “ханна да сырыттаргыт, эһиги дойдугут туһунан, туох үлэни-хамнаһы ыытар туһунан мэлдьитик өйдүү-саныы сылдьыахтааххыт, эһиги ону табатык көрөн, этии киллэрэн, кэлин дойдугутун сайыннарга үлэлэһиэхтээххит». Ону кини ол этиитин быһа гыммакка, бу университеты бүтэрэн, мин төрөөбүт дойдубар үлэлии сылдьабын. Ханнык да уустук түгэннэргэ кини этиилэрин тус олохпор туһанабын.
«Ханнык баҕарар түгэннэргэ кини улуу убайдарбыт этиилэрин, айымньыларын үчүгэйдик ааҕан, билэн, олохпутугар туһаныахтаахпыт”, — диэн Михаил Ефимович этэн турар. Биһиги биир дойдулаахпыт, саха норуодунай суруйааччыта Софрон Петрович Данилов киниэхэ сүбэһит быһыытынан үлэлээбитэ, саха норуотун бастакы конгреһыгар “Саха норуота барҕарыы суолунан” диэн сүрүн дакылаатын оҥорбута. Онон бу Горнай улууһуттан төрүттээх дьону кытта элбэхтик алтыспыт киһи буолар. Холобурун эттэххэ, Саха Өрөспүүбүлүкэтин гербэтин ааптара худуоһунньук, академик Афанасий Николаевич Осипов, онтон Саха Өрөспүүбүлүкэтин гимнын хос ааптара Савва Тарасов буолар.
Михаил Ефимович Даниловтар үбүлүөйдэригэр Бэрдьигэстээххэ кэлэ сылдьан, бэрт табатык этэн турардаах: «бу эһиги, горнайдар, ахсаан быһыытынан баҕардар өрөспүүбүлүкэҕэ улаханнык сабыдыаллыа суохпут дии саныыргыт буолуо. Ол эрэн, мин көрдөхпүнэ, өй-санаа өттүнэн саха норуота уһуктуутугар, кини философията сайдыытыгар бу эһиги сиргит-уоккут, дьоҥҥут-сэргэҕит улахан сабыдыалы оҥорбуттара уонна оҥоро да тураллар».
Биллэн турар, Михаил Ефимович саха норуота өй-санаа өттүнэн сайдарыгар улахан сабыдыалы оҥорбут киһи буолар. Биһиги сахалыы саҥарарбытыгар, култуурабытын, үгэстэрбитин тута сылдьарбытыгар – бу манна барытыгар кини улахан өҥөлөөх диэн өйдөбүллээхпин, — диэн Никита Викторович санаатын түмүктээтэ.
Читайте нас в:
