Саха сиригэр “от сиэбэт” алмаастаах Анаабыр уонна чохтоох Нерюнгри оройуоннарыттан ураты 32 улууска уонна “Дьокуускай”, “Сатай” куораттааҕы уокуруктарга күөх быйаҥ күрэҕэр турунуу күүстээх. Ол туоһута – атырдьах ыйын 3 күнүнээҕи туругунан, былааннаах от 42,85 бырыһыана хомуйулунна. Бу нэдиэлэ бүтүүтүгэр былаан аҥаардаһар чинчилээх.
Отчуоттанар кэмҥэ 187 026 гектар иэннээх сир охсулунна, 196 799 туонна от кэбиһилиннэ. Ааспыт сыл туһааннаах кэмигэр 151 020 туонна от турбута. Онон, быйылгы оттооһун хаамыыта тэтимин ыһыктыбакка, хардыытын өссө кэҥэтэр.
Биирдиилээн улуустарынан тэҥнээн көрдөххө, 50 бырыһыаннаах кирбиини ким хайа иннинэ ылбыт Абый отчуттара 71,32 %-ҥа тириэртилэр: 1 258 туонна кэбиһиилэннилэр. “Сатай” куораттааҕы уокурук 69,81, Нам улууһа 59,91, Куорунай 53,77, Уус Алдан 52,21 бырыһыаннаахтар. Былырыын баччаҕа Абыйга 324, Сатайга 8 (билигин – 185), Намҥа 12 501 (билигин – 16 513), Куорунайга 3 433 (6 536), Уус Алдаҥҥа 12 879 (17 479) туонналыы кэбиһиилээхтэрэ. Онон, бастыҥнар ааспыт сайыннааҕы таһымнарын лаппа куоһаран иһэллэр.
Былырыыҥҥы ардах халаанын содулугар бастакынан түбэспит Үөһээ Дьааҥы отчут-масчыт дьоно былааннарын үстэн биирин толордулар: 33,02 бырыһыаны ситистилэр, ол эбэтэр 9 421 туоннаттан 3 111 туоннатын кэбистилэр. Ааспыт сайын бу кэмҥэ 655 туонна эрэ оттоохторо. Кэбээйи эмиэ, бэлиэр, үстэн биирин чөкөттө: 3 509,910 туонналаах (былырыын 1 533,5 т баара). Бүлүү умнаһынааҕы улуустарга даҕаны тэтимнэрэ үчүгэй, бары 40-тан тахсалыы бырыһыаннаахтар, бастыҥнара Ньурба 47,76 %-ҥа тириэртэ.
Киин уонна илин эҥээрдээҕи улуустар отчуттара эмиэ 40-тан тахсалыы бырыһыаннарын кээрэттилэр. Ол эрээри, арай, таатталар бытаардылар, бу кэмҥэ 29,88 % таһымыгар сылдьаллар. Өрүү буоларыныы, былааннара даҕаны баһырхай: 37 029 туонна от (кээмэйинэн Мэҥэ Хаҥалас уонна Чурапчы кэннилэриттэн үһүс сылдьар).
Кыра кынан баран, кыайтарбат кыһалҕата эмиэ баар. Ол курдук, 62 туонна былааннаах Аллайыаха 1 туоннатын чөкөтөн, 1,54 бырыһыаннанна. Бу саамай намыһах көрдөрүү. Былырыын баччаҕа 21 туонна оттоох этилэр. Маны сэргэ ааспыт сыллааҕы таһымнарын Усуйаана (34 туонна оннугар – 7 туонна), Муома (397,8 – 306) улуустара ситиспэккэ иһэллэр. Ойуур уота сүгүннээбэтэх Үөһээ Халыма, Орто Халыма отчуттара былырыыҥҥыларыттан итэҕэс эрээри, 45-тии бырыһыаннарын хомуйдулар. Ааспыт сайын баччаҕа 83 туонна кэбиһиилээх Эдьигээн билиҥҥэ диэри мэлигир. Аллараа Халыматтан биир даҕаны сибидиэнньэ киирэ илик.
Былырыын сайын ардахха баттатан, баччаларга биир салаа оту быспакка олорбут Өлөөн 44 туонна оту туруорда, саха сүөһүлээх Эбээн Бытантай 92 туонна кэбиһиилэннэ.
Мобильнай биригээдэлэр сир ахсын тэнийэ, сэниэлээхтик хамсана иликтэр. Орто Халыма соҕотох биригээдэтин 30 туонна ото эбиллибэккэ турар. Аммалар 19 биригээдэнэн 1 010 туонна кэбиһиилэннилэр. Үсүһүнэн Куорунай отчуттара эбилиннилэр: 7 звенонан 310 туонна оту туруордулар. Онон билиҥҥитэ 27 звено 1 350 туонна оттоох. Дьиҥэр, улуустар биэрбит сибидиэнньэлэринэн, 160 мобильнай биригээдэ тэриллибит, холбоон 14 901 туонна оту бэлэмниэхтээхтэр.
Василий Никифоров
Хаартыскаларга: Сунтаар Бүлүүчээнигэр күөх быйаҥы сомсор күүрээннээх күннэр
Анна Сергучева (ТХМ пресс-сулууспата) түһэриитэ
Салгыы ааҕыҥ:
Оттооһун хаамыыта: былааннаммыт от үстэн биирэ кэбиһилиннэ
Читайте нас в:
