Саха сирин соҕуруу эҥээригэр этиҥ-чаҕылҕан аргыстаах быстах ардахтар түһэллэриттэн ураты сүөһү-сылгы сүрүн өттүн иитэр киин, илин эҥээрдээҕи уонна Бүлүү умнаһынааҕы улуустарга күөх быйаҥы сомсон хааларга табыгастаах куйаас, кураан күннэр тураллар. От ыйын 27 күнүнээҕи чахчынан 88 071 туонна от (былырыын баччаҕа 79 363 туонна этэ) кэбиһиллэн, былааннаммыт кээмэйтэн 19,31 бырыһыана туолан иһэр. Онон от үлэтэ лаппа тэтимирдэ.
Халлаан маннык туран биэрдэҕинэ, кэлэр нэдиэлэ саҥатыгар былаан чиэппэрдэһэр чинчилээх. Ходуһаҕа ааспыт сайыннааҕар элбэх киһи оттуу сылдьар, ол оннугар тыраахтар ахсаана арыычча аҕыйах. Быйыл 10 408 тимир оҕус тахсыбыт буоллаҕына, былырыын 10 842 көлө баара. Маны, чуолаан, Бүлүү сүнньүгэр, Кэбээйигэ, Куорунайга уонна атын биирдиилээн улуустарга, нэһилиэктэргэ былырыын сайыҥҥы-күһүҥҥү ардахтан, кыһыҥҥы халыҥ хаар уутуттан сир-дойду угуттаан сытарынан быһаарыахха сөп. Илии хотуурун хото тутуннахха эрэ ууга олорор оту баһар кыаллар. Биирдиилээн улуустар, нэһилиэктэр күүлэй тэрийэллэрэ, ыччат дьону көҕүлээн мотуордаах хотуур атыыласпыттарга көмөлөһөллөрө кэрэхсэбиллээх.
Билиҥҥитэ биир даҕаны таска баран оттуурга күһэллибит улуус баара иһиллибэт. Барыларыгар от үүммүт курдук, арай, сорох улуустар ыраах, быраҕыллан сытар сирдэригэр оттоотохторуна кыстыгы туоратар аһылыгы булунар кыахтаахтар. Улуустар бэйэлэрэ сабаҕалыылларынан, былааннаммыт оттон Аллайыаха, Эбээн Бытантай 40 бырыһыантан кыраны, Бүлүү, Кэбээйи, Үөһээ Дьааҥы, Мииринэй, Өймөкөөн, Өлүөхүмэ, Усуйаана, Чурапчы 60-80 бырыһыан икки ардынан хааччыныахтара. Уоннааҕылар 80-тан тахсалыы уонна 100-түү бырыһыан оттонорго суоттаналлар.
Ил Дархан Айсиэн Николаев Аммаҕа оробуочай сырыытын кэмигэр илин эҥээрдээҕи улуустар салайааччыларын түмэн мунньахтыырыгар мобильнай биригээдэлэргэ тирэҕирэллэригэр сүбэлээбитэ уонна улуус таһыттан-иһиттэн тутулуга суох ыраах учаастактарга тиийэн оттуур биригээдэлэр ороскуоттарын толуйууга өрөспүүбүлүкэттэн өйөбүл оҥоһуллуоҕун эппитэ. Бу күннээҕи иһитиннэриинэн, улуустарга 160 биригээдэ тэриллибит, кинилэр 14 901 туонна оту бэлэмниир былааннаахтар. Тыа хаһаайыстыбатын министиэристибэтэ сүөһү дороххой аһылыгар хаһаас пуонданы үөскэтэр үлэни тэрийиигэ анаан 14 мөл. 454 тыһ. солкуобай кээмэйдээх үбү көрөргө торумнуур.
Кумааҕыга мобильнай ахсаана элбэх эрээри, отчуоттанар кэмҥэ Амма улууһугар 14 биригээдэ 433, Орто Халымаҕа 1 биригээдэ 30 туонналыы оту кэбистилэр. Бу кэмҥэ былааннарын 30-50 бырыһыанын кээрэппит улуустар бааллар. Мантан аллара өрөспүүбүлүкэ орто көрдөрүүтүн (19,31%) куоһаран иһэр улуустары, былааннара кыратыттан-улаханыттан тутулуга суох, от үлэтин бастыҥнарыгар киллэрэн билиһиннэрэбит.
Василий Никифоров
Өссө ааҕыҥ:
Мэлирээссийэ: ходуһа уутун түһэриигэ өрөспүүбүлүкэ салалтатын өйөбүлүнэн саҥа тиэхиньикэ кэлэн үлэлээн эрэр
Читайте нас в:
