Оттооһун хаамыыта: өрөспүүбүлүкэ былаанын 10 бырыһыана туолла

balahabahylay 25.07.23 11:35

Тыа хаһаайыстыбатын министиэристибэтэ улуустардааҕы тыа хаһаайыстыбатын салалталара биэрбит сыыппараларын түмэн, от ыйын 24 күнүн киэһэтигэр таһаарбыт суһал иһитиннэриитигэр сигэннэххэ, өрөспүүбүлүкэ ходуһаларыгар 48 237 туонна от кэбиһилиннэ, ол эбэтэр былааннаммыт от 10,50 бырыһыана туолан иһэр. Ааспыт нэдиэлэҕэ киин уонна илин эҥээрдээҕи улуустарга ардаан, оттооһун хаамыытын харгыстыы сырытта.

Отчуоттан көстөрүнэн, былырыын баччаҕа 46 022 туонна от турбут эбит буоллаҕына, охсуу иэнинэн хаалыы бэлиэтэннэ: 65 817 гектар (ааспыт сайын 74 155 гектар этэ). От ыйа баранан эрэр эрээри, Аллараа Халымаҕа 62, Аллайыахаҕа 65, Эдьигээҥҥэ 136, Булуҥҥа уонна Сатайга 265-тии туонна былааннаахтарыттан хас салаа оту быспыттарын туһунан отчуоту биэрэ иликтэр.

Ааспыт сайын баччаларга 60 туонна эрэ оттоммут Үөһээ Дьааҥы хоһуун дьоно быйыл 1 266 туонна оту, бэлиэр, туруорбуттар. Инньэ гынан, сүөһүлэрин-сылгыларын кыстатыахтаах отторуттан 13,44 бырыһыанын чөкөттүлэр.

Уус Алдан отчуттара инники ылбыт тэтимнэрин ыһыктыбакка иһэллэр: 6 932 туонна оту кэбиһэн, былааннарын 20,71 бырыһыанын толордулар. Кэбиспит отторун кээмэйинэн Мэҥэ Хаҥалас 5 593,5 (9,92%), Амма 4 449,5 (13,80%) туонналыы оттонон, үс бастыҥ иһигэр киирдилэр. Оттон былааны толорууга Уус Алдан кэнниттэн Уус Маайа улууһа 502 туонна кэбиһиилээх (18,39%) үһүстэн иккискэ, оттон ааспыт сырыыга (от ыйын 20 күнүнээҕи туругунан) бастаан испит Үөһээ Халыма улууһа үһүскэ (14,17%) түстэ.

– Кэлиҥҥи нэдиэлэҕэ наар уоту кытта охсуһан, от үлэтэ тохтоон турар, – диэн быһаарда Үөһээ Халыма улууһунааҕы тыа хаһаайыстыбатын салалтатын салайааччыта Гаврил Сивцев. – Улуус ылыммыт былаанынан 579, министиэристибэ тиэрдибит былаанынан 655 туонна оту бэлэмниэхтээхпит. Улууспут икки нэһилиэгэр, Арыылаахха уонна Верхнеколымскайга, эрэ сүөһү-сылгы иитэллэр. Былырыын курааннаан, онтон быйыл саас эмиэ бэс ыйыгар ардаабакка, от аанньа тэппэккэ турбута. От ыйын саҥатыгар айылҕа ардаҕа түһэн, кыралаан үүнэн эрэр. Мантан сайын-күһүн халлаан туран биэрдэҕинэ, былааннаах оппутун тиниктэһэн булуохпут. Харчы көрүллэрэ буоллар, эбии сир-уот булан биэрэн (уолбут күөл онно элбэх), мобильнай биригээдэлэринэн оттотуох этибит. Ойуур уота Арыылаахха дьон сирин сиэтэ, уоту утары охсуһар анал этэрээт байыастара бөһүөлэктэн 7 биэрэстэлээх сиргэ тохтоттулар. Манна сирэ туорпа уонна кууран-хатан сытар буолан, умайан, көрдүгэннээн тахса турар. Ону нэһилиэк дьоно маныыллар. Ааспыт күннэргэ сөмөлүөт ардаҕы түһэрэн, арыый холкутуйдубут, оппутугар салгыы турунуохпут.