Көс эбэҥкилэр тирии, тыс имитэргэ туттар тэриллэрбититтэн биирдэстэрэ кыһыах буолар.
Тыһы чооҥкуттан арааран устаһыкка тиирэбит уонна тымтыктыы тыырыллыбыт мастарынан тэптэрэбит. Хаппытын кэннэ, барытын туурабыт, устаһыгын араарабыт уонна дэхси сиргэ ууран олорон кыһыахтыыбыт, ол аата сугатын ыраастыыбыт.
Таба тириитин эмиэ оннук дэхси кына хатарабыт уонна эмиэ дэхси сиргэ кыһыахтыыбыт, онтон уот аттыгар тубуратабыт уонна эмэҕинэн илитэн тыаһатабыт, наһаа күүскэ буолбатах. Олус тыаһаатаҕына түүтэ логлу бара сылдьар буолар.
Тыспытын кыһыахтаан баран эмэхтээх уунан илитэбит, бэйэ-бэйэтигэр сыһыары тутабыт уонна 2 — 3 чаас суулаан сытыарабыт.
Сиигирбитин кэннэ ылан соҥоһоонунан соҥуйабыт эбэтэр үрүөх маска ууран олорон кэдэрээнинэн эбэтэр быһаҕынан үрэбит. Ол кэннэ, кууруор диэри ууннары тарда-тарда имитэбит.
Надежда Колодезникова, «Сардаҥа» хаһыат
Читайте нас в:
