Станцияны чыаппаралар биир дойдулаахтара, “Сахафильтр” ХЭТ генеральнай дириэктэрэ Эдвин Пестряков бэлэхтээтэ. Бу туһунан «Саҥа олох» хаһыат сырдатар.
Үөрүүлээх аһыллыы сиэригэр-туомугар улуус баһылыгын тутууга уонна архитектураҕа солбуйааччы Афанасий Дьячковскай, нэһилиэк баһылыга Иван Оконешников уонна олохтоохтор кыттыыны ыллылар.
Баһылык Иван Оконешников этэринэн, станцияны нэһилиэк олохтоохторо үлэлэтиэхтэрэ, аадырыска тиэрдэн биэрии баар буолуоҕа. Маны таһынан чугас сытар Бахсы нэһилиэгэр ыраас ууну тиэрдэн биэрии хайысхатын эмиэ көрөллөр.
— “Сахафильтр” тэрилтэ 2015 сыллаахха тэриллибитэ. Саха сиригэр 300-тэн тахса эбийиэги үлэлэтэбит. Ол курдук, нэһилиэнньэлээх пууннарга, социальнай, промышленнай эбийиэктэргэ маннык станциялары туруоран үлэлэтэбит, ону таһынан ыраас ууну тиэрдэн биэрэбит.
Бэйэм манна Чыаппараҕа төрөөбүтүм, оскуоланы бүтэрбитим. Онон дьонум-сэргэм чөл туруктаах буолалларын туһугар, сайын булуустан мууһу таһаарар кыһалҕалары көрсүбэттэрин туһугар бу станцияны бэлэх ууннум.
Эбийиэк дьиэтэ эрдэ баар этэ, ону нуормаҕа эппиэттиир гына өрөмүөннээбиппит. Оборудование бэйэтин сыаната 500-тэн тахса тыһыынчалаах, — диэтэ Эдвин Пестряков.
Елена Макаринская
Читайте нас в:
