Саха сиригэр гаас утаҕын тардыы тэтимнээхтик бара турар. Быйылгы сылга социальнай бырагыраама хайысхатынан өрөспүүбүлүкэҕэ 2 тыһыынча кэриҥэ дьиэҕэ күөх төлөн холбонуохтаах. Бу туһунан Ил Дархан Айсен Николаев «Саха» НКИХ ханаалыгар сиһилии кэпсээтэ.
— Биһиги президеммит Владимир Владимирович Путин «Биир ньыгыл Арассыыйа» баартыйа этиитин өйөөн, бу бэртээхэй уурааҕы ылан, дойдуга социальнай газификация өйдөбүлэ баар буолла. Урут биһиги гаастааһын итинник таһымыгар тиийэ илик этибит. Аҥардас былырыын 3 тыһыынча кэриҥэ дьиэҕэ күөх төлөн уотун киллэрдибит. Уочаракка турбут дьону барыларын хааччыйан эрэбит, гаас ситимнэрин таһыгар баар улуустарга да, куоракка да үлэ бара турар. Ити олус улахан ситиһии, — диэн Ил Дархан гаастааһын үлэтигэр сыанабылы биэрдэ.
— Билигин социальнай газификация систиэмэтэ үлэлээн, «Газпром» нөҥүө улахан үбүлээһин баран, ити олоххо киирдэ. Уонунан сылларга аккаас ыла олорбут дьон дьиэлэригэр гаас киирэн, үөрүүлэрэ сүрдээх. Уонна оттон “Сахатранснефтегаз” курдук бэйэбит хампаанньалаах буолбуппут эмиэ абыраата, кинилэр бу үлэни бэйэлэрэ оҥороллор. Холобура, Арассыыйа атын регионнарыгар “Газпром” атын бэдэрээтчиттэр нөҥүө гаастааһыны ыытар. Оттон Саха сиригэр маннык үчүгэй хампаанньа үлэлии сылдьарыттан “газпромнар” да үөрэллэр, биһиги да тэрилтэбит Саха сиригэр нэһилиэнньэ олоҕун таһыма үрдүүрүгэр улахан интэриэстээх тэрилтэ буоллаҕа дии.
Ону кытта «Газпромы” кытта улахан кэпсэтии түмүгэр “Сибиир күүһэ” гаас утаҕын таһыгар сытар улуустарбыт холбонон эрэллэр. Ол курдук Ленскэй, Өлүөхүмэ, Алдан, Нерюнгри. Билигин түргэнник хамсаныы баран, отучча бөһүөлэги кэлэр сылларга гаастыахпыт. Үлэ саҕаланна. Кэлэр ыйга Өлүөхүмэ куоракка киирэр гаас ситимин тардыы үлэтэ саҕаланыахтаах. Ити курдук, соҕуруу сытар улуустарбыт гаастаннахтарына, тыһыынчанан киһи итинэн туһанан, олохторун таһыма үрдүө, — диэн Айсен Николаев санаатын түмүктээтэ.
Ulus.Media. Андрей Сорокин хаартыскаҕа түһэриитэ, СИА
Өссө ааҕыҥ:
Айсен Николаев: Арктика улуустара сайдыы суолугар киирэн эрэллэр
Читайте нас в:
