Бу биэс сыл иһигэр Саха сирин улуустара, ол иһигэр Арктика оройуоннара сайдыы суолугар үктэннилэр. Бу туһунан Саха Өрөспүүбүлүкэтин баһылыга Айсен Николаев “Ил Дарханныын кэпсэтии” биэриигэ сиһилии кэпсээтэ.
— Урут таҥнары бара сылдьыбыт хоту улуустарбыт төттөрү сайдыы суолугар киирэн эрэллэр. Миигин Арктикабыт улуустара үөрдэллэр. 2018-2019 сылларга тиийэ сырыттахха, киһи хараастар этэ. Билигин Тиксиини ылан көрдөххө, дьон хайдах бу манна олоробутуй диэн ытаабат-соҥообот, хайдах сайдабытый, тугу оҥоробутуй диэн кэпсэтиилэр буолаллар. Бөһүөлэккэ уһуннук туруорсаммыт, ити Хотугу муорабыт суола үлэтин күүскэ саҕалаан, Тиксии таһыгар дириҥ уулаах Найба порт тутуллар суола көһүннэ. Тиксиигэ бэйэтигэр байыаннайдар көмөлөрүнэн, биһиги да көмөбүтүнэн улахан тутуулар саҕаланаллара биллэр, суол-иис да оҥоһуллар буолла. Хаарбах дьиэлэри суох оҥорууга бырагыраама үлэтэ эмиэ көстөр. Ити соҕотох Арктика оскуолатын хапытаалынай өрөмүөнүн оҥоро сылдьарбытыттан дьон сүрдээҕин үөрбүт. Тоҕо диэтэр итинник тутуулар, өрөмүөн үлэтэ Сэбиэскэй былаас суох буолбутун кэннэ суох этэ.
Эдьигээн улууһун ылан көрдөххө, урукку сылларга балай да хаалан испит улуус. Быйыл улууска Култуура дыбарыаһа тутуллан киириэхтээх.
Бэрт түргэн тэтиминэн спортивнай комплекс тутулла турар. Эһиил биһиги бастакы олимпийскай чемпиоммут Роман Михайлович Дмитриев үбүлүөйүгэр анаан үлэҕэ киириэхтээх. «Якутоптторг” хайысхатынан саҥа атыы-эргиэн логистическай киинэ тутулла турар. Ити эмиэ дьону олус үөрдэр, кырдьыктыы олох үчүгэйгэ уларыйан эрэрин көрдөрөр, — диэн Айсен Николаев биэрии кэмигэр санаатын үллэһиннэ.
Ulus.Media. Андрей Сорокин хаартыскаҕа түһэриилэрэ, СИА
Читайте нас в:
