Ulus.Media инфографиката
Тыа хаһаайыстыбатын министиэристибэтигэр түмүллэр дааннайдарынан, от ыйын 20 күнүнээҕи туругунан, өрөспүүбүлүкэ үрдүнэн 47 392 гектар (былырыын баччаҕа 37 656 гектар этэ) иэннээх сир охсуллубут, 30 498 туонна (17 437 туонна этэ) от кэбиһиллибит. Ходуһаларга 6 687 звено (5 528 этэ) отчуттара 7 798 тыраахтар (6 900 этэ) күүһүн көлүнэн үлэлии сылдьаллар. Онон, оттооһун хаамыыта ааспыт сыллааҕар билиҥҥитэ бары өттүнэн тэтимнээх уонна көрдөрүү даҕаны куһаҕана суох.
Саба быраҕан көрдөххө, 1 тыһыынчалаах кирбиини Дьокуускайдыын 8 улууска аһара түстүлэр. Ол курдук, Уус Алдан отчуттара 4 444,1 туонна кэбиһиилээх бастаан иһэллэр. Барыларыттан улахан былааннаах Мэҥэ Хаҥалас улууһа 4 365,8 туонна кэбиһиилээх. Кээмэйинэн үһүс миэстэҕэ Чурапчы бигэтик тутуһан иһэр: билиҥҥитэ 3 824,540 туонна оту чөкөттө. Нам 3 271,1, Амма 2 274, Таатта 2 127, Хаҥалас 1 551, Дьокуускай 1 199,7 уонна ардах атахтаабыт Бүлүү сүнньүттэн Сунтаар 1 109 туонналыы оттоннулар.
Ulus.Media инфографиката
Министиэристибэттэн тиэрдиллибит былааны толоруу көрдөрүүтүгэр Үөһээ Халыма улууһа инники сылдьар: 655 туонна былааннааҕыттан 92,8 туоннатын (14,17%) кэбистэ. Иккискэ Уус Алдан 13,27, үһүскэ Уус Маайа 12,19 бырыһыаннаах (былаана – 2 730 т, кэбиһиитэ – 332,8 т) иһэллэр. Өссө 10 бырыһыаннаах кирбиини Нам (11,87%) уонна Дьокуускай (11,06%) ыллылар. Мэҥэ Хаҥалас отчуттара лаппа чугаһаттылар (9,92%).
Саамай кыһалҕалаах балаһыанньа Бүлүү улууһугар үөскээтэ: ааспыт сайыннааҕы, күһүннээҕи уһун самыыртан угуттаабыт ходуһаларын уута түспэккэ, онуоха сааскы хаар уута, быйылгы ардах эбиискэлэһэннэр, өрүс уҥуор 4, бэтэрээ эҥээргэ 2 нэһилиэккэ ыксаллаах быһыыны-майгыны биллэрдилэр. Билиҥҥитэ 745 туонна кэбиһиилээхтэр, былырыын баччаҕа 657 туонналаах этилэр. Былырыын сайын айылҕа содулуттан эмсэҕэлээбит Кэбээйи улууһугар 406,2 (ааспыт сайын баччаҕа 260,5 т этэ), Үөһээ Дьааҥыга 464 (15 эрэ этэ) туонналыы оттоннулар.
Билиҥҥи туругунан, мобильнай биригээдэлэри икки улууска эрэ хамсатан эрэллэр. Аммаҕа 9 звено 157, Орто Халымаҕа 1 звено 17 туонна оту чөкөттүлэр.
Оттооһун хаамыыта ити курдук, сүнньүнэн, киин уонна илин эҥээрдээҕи улуустарга тэтимнээхтик баран иһэр. Арай, бэҕэһээҥҥиттэн Борокуоппайап ардаҕа кэлэн, охсуллубут оту сытытардыы ньиккирэччи түһэрэ сэллии илик.
Василий Никифоров
Также по теме:
Глава Якутии призвал усилить поддержку мобильных сенокосных бригад
Читайте нас в:
